Tags-Bahaar

ham haiñ nairañgī-e-bahār ke rañg
naḳhl-o-barg-o-gul-o-samar haiñ ham

ruke to sāya-e-abr-e-bahār ban ke ruke
chale to gardish-e-lail-o-nahār le ke chale

lahū lahū sā dil-e-dāġh-dār le ke chale
chaman se tohfa-e-fasl-e-bahār le ke chale

phir chaman meñ ġhuncha-e-nauras ne liiñ añgḌā.iyāñ
phir surūd-afzā bahār-e-gulistāñ hone lagī

bahār-e-gul meñ qadam qadam par shu.ūr-e-kāmil kī hai zarūrat
bahār un ke liye ḳhizāñ hai jo ye na samjhe bahār kyā hai

mirī nigāhoñ meñ phir rahā hai tirā takallum tirā tabassum
mirī nigāhoñ se koī pūchhe ye phuul kyā hai bahār kyā hai

'amjad' in ashk-bār zamānoñ ke vāste
ik sā.at-e-bahār kā nazrāna chāhiye

sair-e-chaman se dil na lagāo chale chalo
fasl-e-bahār paañv kī zanjīr ho na jaa.e

'az.har' tirā nasīb hai ye shabnamī bahār
chehre pe tū bhī rañg-e-ḳhizāñ mal ke dekh le

use kaho ġham-e-tārāji-e-chaman ho use
had bahār o ḳhizāñ se guzar ga.e ham tum

nazzāra kyā harīf ho us barq-e-husn kā
josh-e-bahār jalve ko jis ke naqāb hai

mīnā-e-mai hai sarv nashāt-e-bahār se
bāl-e-tadrrav jalva-e-mauj-e-sharāb hai

chāroñ taraf bahār ke āsār the magar
naqsh-e-namūna sabza-e-begāna kā milā

chaman vāloñ se mujh sahrā-nashīñ kī būd-o-bāsh achchhī
bahār aa kar chalī jaatī hai vīrānī nahīñ jaatī

yuuñ hī aatī nahīñ ḳhushī kī bahār
saikḌoñ ġham uThāne hote haiñ

allāh re intizār-e-bahārāñ kī lazzateñ
guzrī hai yuuñ ḳhizāñ bhī ki din hoñ bahār ke

sharminda ham junūñ se haiñ ek ek taar ke
kyā kījiye ki din haiñ abhī tak bahār ke

ye nāznīñ ki jise qāsid-e-bahār kaheñ
javāñ hasīna ki fitrat kā shāhkār kahīñ

gul pe ye shabnam nahīñ paanī chhiḌaktī hai bahār
hā.e-re kinne lagā.ī aa ke is gulshan ko aag