Tags-Bahaar

is ārā.ish se to kuchh aur ubhrī un kī vīrānī
babūloñ par bahār aa.ī to vīrānoñ ke dil TuuTe

ḳhūn-e-gulshan hai pas-e-parda-e-ailān-e-bahār
dekhnā ġhuncha-e-nauras meñ sharārā to nahīñ

piirī meñ shuġhl-e-mai hai javānanā roz-o-shab
bū-e-bahār aatī hamārī ḳhizāñ meñ hai

vo jis ke dāman meñ shā.erī thī bahār-lahje kī luT-luTā kar
ai rabb-e-lafz-o-bayāñ vo shā.er tirī panāhoñ meñ aa gayā hai

bahār to ik muġhālta hai ḳhizāñ kī rū-posh hairatoñ kā
jo is tilism-e-jahāñ se guzrā vo dāstānoñ meñ aa gayā hai

ye kyā ġhazab hai ki jis ne ahd-e-bahār chāhā na ishq dekhā
nizām-e-hijr-o-visāl saarā usī ke hāthoñ meñ aa gayā hai

nazar azāboñ meñ ghir ga.ī hai suḳhan sarāboñ meñ aa gayā hai
sunā hai ab ke bahār-mausam ḳhizāñ kī bātoñ meñ aa gayā hai

bahār-rut meñ bichhaḌ ke tujh se jo dil pe guzrī vo dil hī jaane
hameñ to itnā patā hai yaaro lahū tak āñkhoñ meñ aa gayā hai

bahār kyā ab ḳhizāñ bhī dekhe ġhurūr-e-husn-e-suḳhanvarī meñ
jo āsmānoñ meñ jā basā thā zamīñ ke qadmoñ meñ aa gayā hai

bad-tar ḳhizāñ se hai hameñ is baaġh kī bahār
boī nifāq phuul meñ hī zahar phal meñ hai

bahār ab ke na Thahrī kisī bhī qarye meñ
na bāġh-e-ḳhvāb na sahrā-e-hū meñ phuul khile

shāyad bahār aa ga.ī mauj-e-junūñ liye
dāman jo sil ga.e the vo phir chaak ho ga.e

aise gulshan meñ kahāñ rāt-kī-rānī mahke
jis ke har goshe se katrā ke guzartī ho bahār

kalī dil-e-tabāh kī khilī na 'chishti'-e-hazīñ
ḳhizāñ bhī aa ke jā chukī bahār bhī guzar ga.ī

taaze khile haiñ daaġh ke gul dil ke baaġh meñ
phir mausam-e-bahār huā kyā bajā huā

kuchh mauj-e-havā pechāñ ai 'mīr' nazar aa.ī
shāyad ki bahār aa.ī zanjīr nazar aa.ī

maiñ aap bahār apnī maiñ apnā hī manzar huuñ
ḳhud apne hī ḳhvāboñ kī ḳhushbū se mo.attar huuñ

mire nasīb kā nauha ḳhizāñ ye ahd-e-ḳhizāñ
tire karam kā fasāna bahār guzrī bahār

har ek sarv-e-ravāñ par gumāñ ki jaise vahī
ho merā maazī mirī yādgār guzrī bahār

kisī tarah mujhe pāgal na kar sakī varna
tire baġhair bhī aa.ī bahār guzrī bahār