Tags-Bahaar

na siina chaak hai koī na ab garebāñ chaak
gayā na jaane vo sarmāya-e-bahār kahāñ

hotā hai gul kī tarz se iz.hār is tarah
ye paara paara dāman-o-jeb-e-bahār hai

ye shāḳh-e-gul pe ġhuncha-e-gul se bahār kā
yaaro dil-e-girafta dekho āshkār hai

kahne lagī vo uqda-e-ḳhātir ko khol kar
gul gul shagufta huuñ maiñ sunūñ jo bahār hai

shabnam kā kuchh nahīñ gul-e-nargis o pur-asar
ye dekh lo bahār kī chashm ashk-bār hai

ye hāl-e-ḳhasta dekh chaman meñ bahār kā
hasrat se mere dil ke upar ḳhaar ḳhaar hai

safhe pe kab chaman ke havā se ġhubār hai
ye apne sar pe ḳhaak uḌātī bahār hai

patthar se maar maar ke sar rotī hai bahār
jis ko chaman meñ kahte haiñ ye ābshār hai

gulshan ke biich ye gul-e-sad-barg niiñ hai zard
ai āshiqo bahār kā rañg-e-azār hai

ka.aba ko jā na 'shauq' abhī niyyat-e-zindagī ba-ḳhair
ham bhī chaleñge tere saath ab kī bahār dekh kar

ug rahā hai dar-o-dīvār se sabza 'ġhālib'
ham bayābāñ meñ haiñ aur ghar meñ bahār aa.ī hai

yahī tañg haal jo sab kā hai ye karishma qudrat-e-rab kā hai
jo bahār thī so ḳhizāñ huī jo ḳhizāñ thī ab vo bahār hai

rakkhī thī jis pe terā nasheman bahār meñ
kyā iltifāt-e-barq isī shāḳh par huā

hai shaad apne phuul siiñ har bulbul ai 'sirāj'
vo yār-e-nau-bahār hamārā kab aa.egā

pahā.diyāñ huī irfān-e-āgahī se bahār
jo mo.atakif huiiñ andhī guphāoñ meñ āñkheñ

hamāre ahd kā manzar ajiib manzar hai
bahār chehre pe dil meñ ḳhizāñ kā daftar hai

kis kī bū pā kar chaman meñ chaar din Thahrī bahār
ram ga.ī phūloñ meñ bū kis kī shabāhat dekh kar

ye kis adā se chaman se bahār guzrī hai
sulag sulag ke tamannā hazār guzrī hai

ḳhaar tadbīr hai pesh-e-gul-e-taqdīr abas
vaqt par baaġh meñ aatī hai bahār aap se aap

numū kā josh kuchh nazzāra-farmā ho to ho varna
bahār ab ke baras ḳhud pa.imāl-e-ḳhushk-sālī hai