Tags-Bahaar

kahīñ na aisā ho apnā vaqār khā jaa.e
ḳhizāñ se phuul bachā.eñ bahār khā jaa.e

jis ko ki dastaras huī dāmān-e-yār tak
gulshan meñ dahr ke vahī pahuñchā bahār tak

aa.ī bahār jā.iye sahrā meñ shahr chhoḌ
muj ko junūñ hai ghar meñ rahūñ haa.e kab talak

nadīm baaġh meñ josh-e-numū kī baat na kar
bahār aa to ga.ī rañg-o-bū kī baat na kar

jidhar bhī jaatā hai vo shola-e-bahār-sarisht
duā.eñ detā hai amboh-e-kushtgāñ us ko

aatī hai zindagī meñ ḳhizāñ bhī bahār bhī
sehn-e-chaman meñ phuul bhī hote haiñ ḳhaar bhī

bas-ki haiñ ham ik bahār-e-nāz ke maare hue
jalva-e-gul ke sivā gard apne madfan meñ nahīñ

hañse haiñ gul na kalī koī muskurā.ī hai
huzūr kaise ye kah duuñ bahār aa.ī hai

banā hai hamesha ye dil baaġh o sahrā
bahār aate aate ḳhizāñ aate aate

bahār aa.ī to āñkhoñ meñ ḳhaak uḌne lagī
na koī phuul khilā aur na rañg o bū raushan

bulbuleñ haiñ naġhma-zan phūlā huā hai bāġhbāñ
baaġh meñ khiltī haiñ kaliyāñ kyā bahār aane ko hai

ḳhizāñ ke dam se apnī ḳhush-dilī kā hai bharam varna
bahār aate hī yād-e-āshiyāñ kuchh aur kahtī hai

gulistāñ meñ bahār-e-gul-fashāñ aane se kyā hāsil
ki mustaqbil kī tasvīr-e-ḳhizāñ kuchh aur kahtī hai

ye ḳhudā hī jaane vo kaun thā jo shahīd-e-nāz-o-adā huā
ki uḌī hai ḳhāk-e-rah-e-sanam to ḳhizāñ meñ rañg-e-bahār hai

lahū se apne zamīñ lāla-zār dekhte the
bahār dekhne vaale bahār dekhte the

hai ḳhizāñ nā-āshnā tere gulistāñ kī bahār
tujh pe hai sāya-fagan dāmān-e-lutf-e-kirdgār

ye añgbīn sī rāteñ baḌī muqaddas haiñ
diloñ ke diip jalāo! bahār ke din haiñ

hasīn naġhma-sarāo! bahār ke din haiñ
laboñ kī jot jalāo! bahār ke din haiñ

muġhanniyo! tumheñ kahte haiñ hātif-e-rañgīñ
saman-e-baroñ ko jagāo! bahār ke din haiñ

hai umr-e-rafta se parḳhāsh kyā bhalā ham ko
qarīb hai to bulāo! bahār ke din haiñ