Tags-Bahaar

mire qarīb jo koī gul-e-badan mahkā
to aa.ī yaad koī ḳhush-gavār guzrī bahār

diloñ pe zaḳhm lagā ke hazār guzrī bahār
ga.ī hai chhoḌ ke ik yādgār guzrī bahār

aa.egī phir bahār isī shahr meñ 'munīr'
taqdīr is nagar kī faqat ḳhār-o-ḳhas nahīñ

dekho gul-e-ahār-e-asar dasht-e-shām meñ
dīvār-o-dar koī bhī kahīñ pesh-o-pas nahīñ

tālib-e-hujla-e-bahār dasht-e-talab hai ḳhārzār
vaqt kisī kī raah meñ masnad-e-gul bichhā.e kyuuñ

na dar-o-bām pe raunaq na jharokoñ meñ bahār
dil-e-vīrāñ kī tarah shahr bhī sunsān huā

abhī to dasht-o-daman meñ bahār aa.ī hai
abhī chaman meñ khilāne haiñ gul havāoñ ko

bahār-e-gor-e-ġharībāñ na kyoñ lahad ho mirī
ki jam.a kī hai zamāne kī bekasī maiñ ne

qalam se kātib ye likh rahā hai dalīl-e-sub.h-e-bahār ho tum
dalīl kī daal ko badal kar vo zaal kar de to kyā karoge

tirā jalva jo pā jaatī chaman meñ jā ke iThlātī
bhikāran ban ke baiThī hai tire dar par bahār ab bhī

nairañg-e-husn o ishq kī vo āḳhirī bahār
turbat thī merī aur koī ashk-bār thā

yaqīn-e-sub.h-e-chaman hai kitnā shu.ūr-e-abr-e-bahār kyā hai
savāl karte haiñ dasht-o-dariyā ki qāfile kā vaqār kyā hai

jur.at to dekhiyegā nasīm-e-bahār kī
ye bhī balā.eñ lene lagī zulf-e-yār kī

gulshan meñ dekh kar mire mast-e-shabāb ko
sharmā.ī jaarī hai javānī bahār kī

chorī kahīñ khule na nasīm-e-bahār kī
ḳhush-bū uḌā ke laa.ī hai gesū-e-yār kī

bahār-āfrīñ moḌ par hai karachi
na.ī raushnī kā nagar hai karachi

sair-e-bahār-e-bāġh se ham ko muaaf kījiye
us ke ḳhayāl-e-zulf se 'dard' kise farāġh hai

chaman ye shahr-e-nigārāñ banā to hai lekin
mirī bahār ko chhoḌ aa.ī hai bahār kahāñ

chaman se duur bhī dekhī hai fasl-e-gul ham ne
magar vo silsila-e-naġhma-e-bahār kahāñ

havā chaman kī bhalā ham ko sāzgār kahāñ
bahār naam ko hai asal meñ bahār kahāñ