Tags-Bahaar

kaise kahūñ use ye dulhan hai bahār kī
phūloñ kā ḳhuuñ mahaktā hai jis ke suhāg meñ

un laboñ kī yaad aa.ī gul ke muskurāne se
zaḳhm-e-dil ubhar aa.e phir bahār aane se

chaman meñ rahne vāloñ se to ham sahrā-nashīñ achchhe
bahār aa ke chalī jaatī hai vīrānī nahīñ jaatī

ye nasīm-e-saharī aaj ḳhabar laa.ī hai
saal guzrā mire gulshan meñ bahār aa.ī hai

hai magar aaj nazar meñ vo bahār-e-dil-gīr
kar diyā dil ko farishtoñ ne tarab ke tasḳhīr

aur hī rañg pe hai aaj bahār-e-gulshan
sair ke vāste aa.e haiñ azīzān-e-vatan

pattī pattī se huā rañg-e-vafā kā iz.hār
naujavānān-e-chaman ban ga.e tasvīr-e-bahār

ruḳhsār-e-gul ke til se haiñ hairān ḳhushbueñ
hai mausam-e-bahār meñ ambar-ba-kaf huā

ahd-e-shabāb thā bahār aur sajā bahār ko
jitnī jahāñ meñ mil sakī is ne hayā ḳharīd lī

kyā kaam 'riyāz' aane ko sau baar bahār aa.e
ham ko ye hasīñ phūlne-phalne nahīñ dete

aatī ba-ḳhud nahīñ hai bād-e-bahār ab tak
do gaam thā chaman meñ Tak naaz se chalā tū

sharāb laao kabāb laao hamāre dil ko na ab ghatāo
shurūa dūd-e-qadah ho jaldī ki sar pe abr-e-bahār aayā

abhī sehn-e-jāñ meñ bichhī huī jo bahār hai use kyā kahūñ
maiñ kisī itaab kī zad meñ huuñ tū kisī malāl ke darmiyāñ

tere aane kā intizār rahā
umr bhar mausam-e-bahār rahā

kis kis kī dekhiye chaman-e-san.a meñ bahār
apnī faqat do chashm haiñ aur yaañ bahār-hā

bahār kuchh jo milī rañg-o-bū se begāna
vo aa ga.e ki anāsir meñ intishār na ho

ye zulf-o-ruḳh ye shab-o-roz ye bahār-o-ḳhizāñ
vo silsila hai ki qat-e-nazar bhī baar na ho

jhoñkā havā-e-sarv kā rindoñ ke vāste
ḳhum-ḳhāna-e-bahār se hukm-e-javāz thā