Tags-Bahaar

gard-e-lail-o-nahār haiñ lekin
ġhāza-e-nau-bahār haiñ ham log

bahār-e-fikr ke jalve luTā diye ham ne
junūn-e-ishq ke dariyā bahā diye ham ne

khile ġhunche na bū phūTī na shāḳh-e-gul phalī-phūlī
qafas meñ jab se ham aa.e bahār aa.ī ḳhizāñ ho kar

bazm-e-bahār-e-kunj-e-haram sehn-e-mai-kada
dīvāngī ne hashr uThā.e kahāñ kahāñ

rañg-e-girya ne dikhā.ī nahīñ aglī sī bahār
ab ke lagtā hai ki āmezish-e-ḳhūñ kuchh kam hai

vo misl-e-mauj-e-bahār apne shabāb kī samt aa rahe haiñ
diloñ ke ġhunche khilā rahe haiñ nazar kā dāman sajā rahe haiñ

shabāb kar diyā merā tabāh ulfat ne
ḳhizāñ ke haath kī boī huī bahār huuñ maiñ

afsurdagī bhī husn hai tābindagī bhī husn
ham ko ḳhizāñ ne tum ko sañvārā bahār ne

har ḳhizāñ ġhārat-gar-e-chaman hī sahī
phir bhī ik sarḳhushī bahār meñ hai

chand kaliyoñ ke chaTakne kā nahīñ naam bahār
qāfila kal kā chalā thā to kahāñ hai ab ke

isī duniyā meñ dikhā deñ tumheñ jannat kī bahār
shaiḳh jī tum bhī zarā kū-e-butāñ tak aao

ai bahār tujh ko is kī kyā ḳhabar
ai nigār tujh ko kyā patā

suraḳh-rū kar de sharāb aa.ī bahār
hai ḳhizāñ se zard ai ḳhummār rañg

zulf-e-mushkīñ lāla-ruḳh gul-pairahan mast-e-bahār
mausam-e-gul hai tumhāre baam par aane kā naam

gul apne ġhunche apne gulsitāñ apnā bahār apnī
gavārā kyuuñ chaman meñ rah ke zulm-e-bāġhbāñ kar leñ

guloñ ko loriyāñ detā thā e'tibār-e-bahār
chaman meñ sabza-e-begāna pā rahā thā numūd

nazar nazar meñ liye terā pyaar phirte haiñ
misāl-e-mauj-e-nasīm-e-bahār phirte haiñ

bahār aa ke chalī bhī ga.ī magar 'jālib'
abhī nigāh meñ vo lāla-zār phirte haiñ

baaġh be-sarfa chal ke kyā kiije
jin se thī baaġh kī bahār nahīñ

vahī dīvāngī merī hai bahār aane do
dekh kar laḌkoñ kī sūrat ko bahal jā.ūñgā