Tags-Bahaar

ik nau-bahār-e-nāz ko taake hai phir nigāh
vo nau-bahār-e-nāz ki hai jān-e-lucknow

mutrib bhī hai sharāb bhī abr-e-bahār bhī
shīrāz ban gayā hai shabistān-e-lucknow

kitne uruuj par bhī ho mausam bahār kā
hai phuul sirf vo jo sar-e-zulf-e-yār ho

mahv-e-ḳhirām ġhuncha-o-gul dekh-bhāl kar
pāmālī-e-bahār hai ye sair to nahīñ

abr-e-bahār ab bhī jachtā nahīñ nazar meñ
kuchh āñsuoñ ke qatre ab bhī haiñ chashm-e-tar meñ

phir ḳhabar is fasl meñ yaaro bahār aane kī hai
ab ba-juz zanjīr kyā tadbīr dīvāne kī hai

ab ke gulshan meñ ajab rañg se aa.ī hai bahār
shāḳh-e-gul par bhī hameñ ḳhaar nazar aate haiñ

bahār ban ke chaman kī fazā meñ shāmil hai
ye kis ke jism kī ḳhushbū havā meñ shāmil hai

hazār qaid-e-ḳhizāñ se chhuT kar bahār kā aasrā kareñge
bahār bhī ham-qafas-zadoñ ko na raas aa.ī to kyā kareñge

tirī bazm kā misl hī yaar nahīñ ki jināñ meñ ye naqsh-o-nigār nahīñ
kahīñ tere chaman se bahār nahīñ mujhe bāġh-e-iram kī fazā kī qasam

hamāre paas hai kyā daulat-e-junūñ ke sivā
nisār chaak garebāñ agar bahār mile

guloñ pe sāya-e-ġham-hā-e-rozgār mile
bharī bahār ke chehre bhī sogvār mile

sunīñ to ābla-pā.ī kī dāstāñ lekin
kahāñ 'shamīm' sā āshufta-e-bahār mile

yaanī zaḳhmoñ ke gulistāñ pe bahār aa ga.ī phir
yaanī ab bhī mirī āshufta-sarī hai koī chiiz

ḳhush-āmdīd vo aayā hamārī chaukhaT par
bahār jis ke qadam kā tavāf kartī hai

inqalāb aa.egā koī ki bahār aa.egī
ḳhāl-o-ḳhad chehra-e-gītī ke nikhar jaane do

dosto jashn manāo ki bahār aa.ī hai
phuul girte haiñ har ik shāḳh se aañsū kī tarah

maarā huā huuñ go ḳhalish-e-intizār kā
mushtāq aaj bhī huuñ payām-e-bahār kā

dil nahīñ tujh ko dikhātā varna dāġhoñ kī bahār
is charāġhāñ kā karūñ kyā kār-farmā jal gayā

dil ke shajar ko ḳhuun se gulnār dekh kar
ḳhush huuñ na.ī bahār ke āsār dekh kar