Tags-Bahaar

sho.ala-e-gul kī baḌhā detī hai lau-e-bād-e-bahār
tah-e-shabnam bhī dahak uThtī hai ik chiñgārī

baaġh ujaḌne kā ġham hī kyā kam hai
jaane bhī de ġham-e-bahār na kar

hamāre ashk miTāte haiñ dāġh-e-dil kī bahār
ye āb-e-shor kī nahreñ haiñ baaġh ke nazdīk

vo saath jab tak rahe hamāre bahār apne shabāb par thī
vo kyā ga.e ki dil-o-nazar meñ udaas mausam Thahar ga.e haiñ

tamām sho.ala-e-gul hai tamām mauj-e-bahār
ki tā-had-e-nigah-e-shauq lahlahāte haiñ baaġh

maiñ samajhtā huuñ ki ab sirf kutub-ḳhānoñ meñ
muñh zamāne se chhupā.e hue baiThī hai bahār

us ke ghar bhī tujh ko aanā chāhiye thā ai bahār
jis ne sab ke vāste māñgī duā barsāt kī

chand roza bahār par mat jā
gul kā anjām kyā huā kuchh soch

ye hasīñ rut ye chāñdnī ye bahār
aise aalam meñ to na jā kuchh soch

lutf-e-nazzāra-e-bahār uThā
sharh ajzā-e-barg-o-bār na kar

baserā rahā us kā sehn-e-chaman meñ
magar ye bahār āshiyāñ tak na pahuñchī

aa.e haiñ din bahār ke sayyād kah rahā
taa.ir qafas meñ baaġh ke ghabrā.e jaate haiñ

fasl-e-gul rañg-e-chaman daur-e-ḳhizāñ husn-e-bahār
muḳhtalif naam haiñ saaqī tire paimānoñ ke

bahār ne kiyā mansūba-e-hinā-bandī
manāo jashn ki sab zaḳhm bhar ga.e apne

lagā hai dil ko ab anjām-kār kā khaTkā
bahār-e-gul se bhī ik pahlū-e-ḳhizāñ niklā

kis aahaT kī bahār se pag pag dhuul ke phuul khile
kis mausam ne Thokar khaa.ī ham majbūroñ se

nairañgi-e-bahār-o-ḳhizāñ dekhte rahe
hairat se ham tilism-e-jahāñ dekhte rahe

firāqe-e-gul meñ itnā tū abas nālāñ o muztar hai
bahār-e-rafta phir ai bulbul-e-dil-gīr phirtī hai

zindagī terī bahār chamanistān-e-vafā
aabrū tere liye qaum se paimān-e-vafā

thī samā.ī huī punā kī bahār āñkhoñ meñ
āḳhirī daur kā baaqī thā ḳhumār āñkhoñ meñ