Tags-Bahaar

pherā bahār kā to baras do baras meñ hai
ye chaal hai ḳhizāñ kī jo ruk ruk ke tham ga.ī

aa bhī jā tū ki dil ke gulshan meñ
phuul ḳhushbū bahār chāhtā huuñ

bahār hai daur-e-mai-kashī kī guloñ kī rañgat abhī hai phīkī
ajiib hālat hai 'muntahī' kī abhī se chhātī dhaḌak rahī hai

bahār laayā hai sāġhar-e-gul bhare haiñ goyā piyāla-e-mul
nahīñ hai mahfil meñ shor-e-qulqul chaman meñ bulbul chahak rahī hai

ġhurūr-e-husn ai nigār kab tak chaman ke uupar bahār kab tak
rahoge zeb-e-kanār kab tak ḳhizāñ har ik gul ko tak rahī hai

jo mere saath hai sadiyoñ se misl-e-aks-e-bahār
ḳhabar nahīñ ki hai vo shaḳhs kis qabīle se

ġhunchoñ se pyaar kar ke ye izzat hameñ milī
chūme qadam bahār ne guzre jidhar se ham

bahār aa.ī hai ab to ai junūñ ho silsila jumbāñ
ki ham muddat se qasd-e-raftan-e-vīrāna rakhte haiñ

zinda huuñ phir bhī ek umīd-e-bahār par
pattā huuñ aur shajar se jhaḌā bhī huā huuñ maiñ

bahār aa.ī ki din holī ke aa.e
guloñ meñ rañg khelā jā rahā hai

tum na chāho to ye nasīm-e-bahār
gul chaman meñ khilā nahīñ saktī

ye alag baat ki phūloñ pe ho zaḳhmoñ kā gumāñ
maiñ to jab aatā huuñ ham-rañg-e-bahār aatā huuñ

yuuñ to pahne hue pairāhan-e-ḳhār aatā huuñ
ye bhī dekho ki ba-saudā-e-bahār aatā huuñ

jaane kyā gul khilā.e shām-e-bahār
hasrat-e-zulf-o-lab nahīñ dil meñ

mirī bahār-e-tamannā ko jāvedāñ kar de
maiñ kyā karūñgā bhalā umr-e-rā.egāñ le kar

fasl-e-bahār aa.ī piyo sūfiyo sharāb
bas ho chukī namāz musallā uThā.iye

ye koh-o-dasht bhī ā.īna-e-bahār bane
faqat chaman ke nazāre mujhe qubūl nahīñ

har saal bahār se pahle maiñ paanī par phuul banātā huuñ
phir chāroñ mausam likh jaate haiñ naam tumhārā āñkhoñ meñ

sehn-e-gulshan meñ tarab-ḳhez bahār aate hī
ham ne har phuul ko paimāna banā kar chhoḌā