Tags-Bahaar

hameñ bahār ke āsār kī tavaqqo.a thī
ruḳh chaman pe nishānāt-e-inqalāb mile

asīrān-e-qafas ko vāsta kyā in jhameloñ se
chaman meñ kab ḳhizāñ aa.ī chaman meñ kab bahār aa.ī

kise batā.eñ ki ġham ke sahrā ko ḳhuld-dānish banāyā kaise
kahāñ se āb-e-ravāñ ko moḌā kahāñ se bād-e-bahār laa.e

ai dil-e-be-qarār chup ho jā
jā chukī hai bahār chup ho jā

sar-nigūñ mausam-e-bahār meñ hai
ye shajar kis ke intizār meñ hai

kisī kā ḳhuun sahī ik nikhār de to diyā
ḳhizāñ ko tum ne libās-e-bahār de to diyā

bahār aa.e na aa.e magar lahū ne mire
chaman kī ḳhaak ko ik e'tibār de to diyā

ye aur baat ki dāman ko phuul de na sakī
magar bahār ne talvoñ ko ḳhaar de to diyā

bharī bahār meñ dekhe jo phuul jalte hue
ruke na ashkoñ ke dariyā mirī ghaTāoñ meñ

maiñ bā-vafā hī rahā rah ke be-vafāoñ meñ
gul-e-bahār kī sūrat khilā ḳhizāoñ meñ

ham se qaa.em hai gulistāñ kā bharam
ābrū-e-bahār haiñ ham log

haif sābit hai jeb ne dāman
aur junūn meñ bahār aa.ī hai

dekhā thā ahl-e-dil ne koī sarv-e-nau-bahār
dāman ulajh gayā to pukāre babūl hai

kāñTā hai vo ki jis ne chaman ko lahū diyā
ḳhūn-e-bahār jis ne piyā hai vo phuul hai

bulbul ko bāġhbāñ se na sayyād se gila
qismat meñ qaid likkhī thī fasl-e-bahār meñ

yaar hotā hai mirā lāla-azār ek na ek
daaġh de jaatī hai har saal bahār ek na ek

kahāñ talāsh karegī hameñ bahār ki ham
kabhī qafas meñ kabhī āshiyāñ meñ rahte haiñ

ḳhizāñ kā zikr hī kyā hai ki ai 'ravish' ham ne
bharī bahār guzārī hai gulistāñ se alag

ruḳh pe bahār kī phaban hoñToñ pe maḳhmalī suḳhan
muzhda-e-gul sunā.iye dil hai magar bujhā bujhā

ḳhizāñ ke ḳhushk patte jis meñ din-bhar khaḌkhaḌāte haiñ
isī mausam kā naam ab ke bahār-ījād rakkhā hai