Tags-Bahaar

kuchh guftugū ho aaj urūs-e-bahār se
kuchh ham ḳhizāñ-rasīda bhī hāsil sakūñ kareñ

mai se tauba to kar nahīñ saktā
kyā karūñ mausam-e-bahār aayā

suno ai āshiyāñ ke ḳhushk tinko
bahār-e-bāġh kā paiġhām kyā hai

ye kyā mahal hai ki aaj karte ho shaiḳh jī zikr-e-zohd-o-taqvā
yahī hai vājib ki hoñ gul-o-mul kī vaqt-e-fasl-e-bahār bāteñ

ġhunche ne taaj gul ne kiyā pairahan durust
shādī bahār kī hai huā hai chaman durust

gul jalva-gar haiñ āmad-e-fasl-e-bahār hai
kar bāġhbāñ nasheb-o-farāz-e-chaman durust

paiġhām-e-rustḳhez hai aamad bahār kī
mar kar huī hai nargis-e-bīmār tandurust

buuTe buuTe se numāyāñ hai bahār
Daalī Daalī rañg-o-bū tak aa ga.ī

badan meñ zaḳhm nahīñ baddhiyāñ haiñ phūloñ kī
ham apne dil meñ isī ko bahār jānte haiñ

in āñkhoñ se bahār-e-bāġh-e-duniyā dene vaalo
ye āñkheñ rañg lā.eñgī kisī din ḳhūñ-fishāñ ho kar

karne nazāra baaġh kā niklā hai gul-badan
barjā hai har chaman suuñ gar aave bahār chal

gul fasurda chaman udaas 'shakīl'
yuuñ bhī aksar bahār aa.ī hai

mausam ḳhizāñ hī kā thā magar haal ye na thā
kaisī bahār aa.ī ki ashjār mar ga.e

ham saada hī aise the kī yuuñ hī pazīrā.ī
jis baar ḳhizāñ aa.ī samjhe ki bahār aa.ī

jab bahār aa kar guzar jā.egī ai sarv-e-bahār
ek rañg apnā bhī paivand-e-ḳhizāñ ho jā.egā

yaqīñ bharī-bahār kā bhī kuchh nahīñ
agar ye shāḳh-e-dard hī harī na ho

dekhiye rañg-e-hinā rū-e-shafaq josh-e-bahār
tā.ir-e-ḳhvāb to hai tāb-e-safar hai ki nahīñ

ga.ī bahār magar aaj bhī bahār kī yaad
dil-e-hazīñ kā sahārā hai dekhiye kyā ho

na gul khile na shagūfoñ pe tāzgī aa.ī
ḳhizāñ ke ba.ad chaman meñ bahār bhī aa.ī

ruuh ko bālīdgī ho jis meñ ab vo dil nahīñ
ham-nashīñ mujh ko bahār-e-jāñ-fazā se kyā ġharaz