Tags-Bahaar

bahār aa.ī hai kyūñkar andalībeñ baaġh meñ jāveñ
qafas ke dar ke ta.iiñ kartā nahīñ sayyād vā hargiz

jab tum na the to kuchh bhī nahīñ thā bahār meñ
tum aa ga.e to koī muqābil nahīñ rahā

jab bhī hinā.ī hāthoñ se gesū sañvar ga.e
ā.īna-e-bahār muqābil nahīñ rahā

ik shām-e-ḳhizāñ yahīñ kahīñ hai
ai sub.h-e-bahār yaad rakhnā

chaman meñ rah ke ye mahrūmiyāñ muqaddar kī
ki maiñ bahār ko dekhā karūñ bahār mujhe

ye un kī yaad ye tūfān-e-rañg-o-bū tauba
milī to dard meñ Duubī huī bahār mujhe

fareb-rañg na de jalva-e-bahār mujhe
azīz-tar haiñ chaman meñ guloñ se ḳhaar mujhe

tumhārī jaan hai nik.hat tumhārā jism bahār
mirī ġhazal bhī tumhī merī dāstāñ bhī tumhī

nigār-e-ḳhāk-āsūda
bahār-e-ḳhāk-āsūda

junūñ nahīñ hai ki chāk-e-dāman ko ābrū-e-bahār samjheñ
ḳhizāñ kī yalġhār meñ bhī hamdam ham apnā dāman siyā kiye haiñ

kahāñ hai juuñ sho.ala shāḳh par gul kidhar hai fasl-e-bahār shabnam
tire hai e.ajāz-e-Turfa-tar se falak pe bijlī zamīñ pe bārāñ

bas gayā jab se yaar āñkhoñ meñ
tab se phūlī bahār āñkhoñ meñ

tere hī jalve se hai bāġh-e-tamannā kī bahār
yahī tanvīr hai ā.īna-dil kā paanī

hai asliyat hai ḳhizāñ hī bahār kī tamhīd
bahār chāhe to andesha-e-ḳhizāñ se guzar

abhī mai-kada javāñ hai abhī mauj meñ hai saaqī
abhī jaam raqs meñ hai abhī mai bahār meñ hai

ye merā dāman-e-sad-chāk ye ridā-e-bahār
yahāñ sharāb ke chhīñTe vahāñ gulāb ke phuul

dil meñ aag lagā jaatā hai ye bin yaar bahār kā mausam
ek tapish bhī hotī hai is ThanDī sī phuvār ke pīchhe

zer-e-lab hai abhī tabassum-e-dost
muntashir jalva-e-bahār nahīñ

havā-e-zīst ko aanā hai jab tak aa.egī
bahār ban ke kabhī to kabhī ḳhizāñ kī tarah

ye ajiib sub.h-e-bahār hai koī zindagī kī kiran nahīñ
hamīñ ḳhāliq-e-mah-o-mehr haiñ hamīñ raushnī ko taras ga.e