Tags-Bahaar

chaman meñ phuul khile baaġh meñ bahār aa.ī
urūs-e-dahr ne goyā pahan liyā gahnā

bulbul kaho gul kī kyā ḳhabar hai
gulshan meñ bahār kis qadar hai

nihāl-e-vasl nahīñ sañg-bār karne ko
bas ek phuul hai kaafī bahār karne ko

duniyā meñ bahār ab aa pahuñchī mai-ḳhāne kā dar bhī khul jaa.e
ek ek galī ek ek makāñ gulzār huī gulzār huā

rañgīn hai qatl-e-gul se abhī dāman-e-bahār
dast-e-havas se ḳhuun Tapaktā dikhā.ī de

bahār aa.ī gul-afshānī ke din haiñ
hamārī tañg-dāmānī ke din haiñ

ham aise gul-zadgāñ ko bahār-e-yak-sā.at
nigār-ḳhāna-e-ahd-e-ḳhazāñ se achchhī hai

sadā-e-rañg kī naġhmagarī se khul na sakā
vo ek qufl jo ab tak lab-e-bahār meñ hai

garm hai nahroñ kā paanī sard hai nabz-e-bahār
ḳhushk patte jeb-o-dāman kar rahe haiñ tārtār

yaad aa gayā jo apnā garebāñ bahār meñ
dāman se muñh lapeT liyā aur ro liye

ham-safīro kabhī miTtī hai tamannā-e-bahār
ye kisī phuul kisī sho.ale meñ Dhal jā.egī

afsurdagī kī lai bhī tire qahqahoñ meñ thī
patjhaḌ ke sur bahār ke jhāloñ meñ aa ga.e

phūloñ ko gulistāñ meñ kab raas bahār aa.ī
kāñToñ ko milā jab se ejāz-e-masīhā.ī

misāl-e-sub.h-e-bahār tū hai to maiñ huuñ shām-e-ḳhizāñ kī sūrat
chaman chaman ḳhār-o-ḳhas se mere faroġh hai tere rañg-o-bū kā

na qatl se mere haath khīñcho lahū bahā kar bahār dekho
paḌegī uḌ kar jo chhīñT is kī banegī vo phuul āstīñ kā

sunte haiñ ki chaman mahke bulbul chahke ban lahke haiñ
apne nasheman tak jo na pahuñchī aisī bahār bahār kahāñ

ga.ī bāġh-e-jahāñ se ḳhalq ḳhālī haath le par tū
bahār-e-zindagī se zikr kā gul be-ḳhizāñ le jā

chhoḌā kahīñ na mujh ko nasīm-e-bahār ne
kunj-e-qafas meñ bhī mujhe aa.ī ubhārne

gul kā kiyā jo chaak garebāñ bahār ne
dast-e-junūñ lage mire kapḌe utārne

bhulā de arsh kī jannat kā ḳhvāb āñkhoñ ko
bahār-e-husn se yuuñ mālā-māl thā koī