Tags-Bahaar

ik charāgah harī bharī thī kahīñ
thī sarāpā bahār jis kī zamīñ

na bulbuloñ kī azaañ hai na titliyoñ kā tavāf
abhī chaman meñ gul-e-nau-bahār hai tanhā

kahāñ ke jaib-o-garebāñ jigar bhī chaak hue
bahār aa.ī qayāmat ke nāma-bar kī tarah

ka.ī mausamoñ se talāsh meñ hai mirī nazar
kisī gulsitāñ se bahār kā na pata chalā

na gul na sarv miyān-e-bahār hotā hai
hamārī ḳhaak se paidā chīnār hotā hai

bāl-o-par bhī ga.e bahār ke saath
ab to sūrat nahīñ rihā.ī kī

kahīñ tār-e-dāman-e-gul mile to ye maan leñ ki chaman khile
ki nishān fasl-e-bahār kā sar-e-shāḳh-sār koī to ho

ham ko kab intizār hai fasl-e-bahār ho na ho
dāġh-e-jigar shagufta bād-e-gul ba-kanār ho na ho

har-chand bahār o baaġh hai ye
par kis ko dil o dimāġh hai ye

maiñ ḳhizāñ kī shaam huuñ
rut bahār kī hai tū

jān-e-bahār phuul nahīñ aadmī huuñ maiñ
aa jā ki muskurā.e zamāne guzar ga.e

bahār de na sakī ek phuul ko bhī nikhār
ḳhizāñ ke saath hai rañg-e-bahār kyā hogā

qafas-nasīboñ kā uf hāl-e-zār kyā hogā
phir aa rahī hai chaman meñ bahār kyā hogā

fasurda lāla-o-gul haiñ ravish ravish hai udaas
chaman meñ aise meñ jashn-e-bahār kyā hogā

shikast-e-tauba hai aisī savāb meñ dāḳhil
abhī se tauba 'mubārak' bahār baaqī hai

ga.ī bahār magar apnī be-ḳhudī hai vahī
samajh rahā huuñ ki ab tak bahār baaqī hai

nāzāñ hai jo apnī qismat par gulchīñ ko ye kyā ma.alūm nahīñ
jā.egī bahār aa.egī ḳhizāñ badlegā zamāna phūloñ kā

be-ḳhizāñ hai tasavvur-e-hastī
maiñ abhī ālam-e-bahār meñ huuñ

sard haiñ dil ātish-e-rū-e-nigārāñ chāhiye
sho.ala-rañg-e-bahār-e-gul-ezārāñ chāhiye

nahīñ hai rahnā use bhī bahār meñ 'tāhir'
mujhe bhī mausam-e-shādāb se nikalnā hai