Tags-Bahaar

Tuk dekh leñ chaman ko chalo lāla-zār tak
kyā jaane phir ji.eñ na ji.eñ ham bahār tak

bulbul hai chup fasurda chaman luT ga.ī bahār
maiñ ne kiyā jo chāk-e-garebāñ ko kyā huā

bulbul ke chahchahe haiñ na koī shagufta phuul
ai bāġhbāñ bahār-e-gulistāñ ko kyā huā

pazhmurda dil hai vasl ke armāñ ko kyā huā
rotā huuñ maiñ bahār-e-gulistāñ ko kyā huā

vo aur chiiz hai hote haiñ jis se dil shādāb
tirī bahār se vīrānī-e-ḳhizāñ na ga.ī

dekh ai sayyāh mere des kī ujḌī bahār
is se baḌh kar bhī koī ġhamgīn manzar aa.egā

bū-e-gul ke hujūm-e-raqsāñ meñ
par Thahartī nahīñ bahār kahīñ

havā ke zaḳhm khule the udaas chehre par
ḳhizāñ ke shahar se koTī to pur-bahār gayā

shāḳh-e-tanhā.ī se phir niklī bahār-e-fasl-e-zāt
apnī sūrat par hue ham phir bahāl us ke liye

bahār-e-husn vo aa.e nazar jo us kī 'nazīr'
to dil vahīñ chaman-e-ishq meñ nihāl huā

terī rañgat bahār se niklī
phuuT kar lāla-zār se niklī

mujhe haqīqat se vāsta hai naqīb-e-fitrat huuñ maiñ azal se
ḳhizāñ ko fasl-e-bahār kah duuñ ye merā zarf-e-nazar nahīñ hai

alam bhī kab saath chhoḌ jaa.e kisī ko us kī ḳhabar nahīñ hai
bahār to phir bahār Thahrī ḳhizāñ bhī ab mo'atabar nahīñ hai

dekh aa.e ham bhī do din rah ke dehlī kī bahār
hukm-e-hākim se huā thā ijtamā-e-intishār

miTTī pe aa ga.ī thī zarā der ko bahār
bas log itnī baat pe maġhrūr ho ga.e

kamī kamī sī thī kuchh rañg-o-bū-e-gulshan meñ
lab-e-bahār se niklī huī duā tum ho

shabāb kar diyā merā tabāh ulfat ne
ḳhizāñ ke haath kī boī huī bahār huuñ maiñ

bharī bahār kā siina hai zaḳhm zaḳhm magar
sabā ne gaa.ī hai lorī shafīq maañ kī tarah

nishāñ ashk-e-ḳhūnīñ ke uḌte chale haiñ
ḳhizāñ ho chalī hai bahār-e-garebāñ