Tags-Bahaar

shajar huuñ aur parindoñ se hai bahār mirī
ye mujh pe aa.eñ to phal-phūl aane lagte haiñ

niklā na phir bhī koī natīja bahār kā
ta.abīr se agarche bahut hī laḌe haiñ ḳhvāb

kyā jald din bahār ke yā-rab guzar ga.e
bijlī havā se pūchh rahī hai kidhar ga.e

dāman bachā ke aa.iyo mere mazār tak
ai jān-e-nau-bahār uge haiñ idhar babūl

muddatoñ rū-e-gul kī jhalak ko tarastā rahā maiñ 'shakeb'
ab jo aa.ī bahār us ne sehn-e-chaman meñ na paayā mujhe

ashk barsātī huī aatī hai gulshan meñ bahār
phuul khilte haiñ to shabnam kī tarī hotī hai

ḳhizāñ tamām huī kis hisāb meñ likhiye
bahār-e-gul meñ jo pahuñche haiñ shāḳh-e-gul ko gazand

vo tasavvur meñ ik ghaḌī aa.eñ
der tak dil bahār rahtā hai

phir bahār aa.ī vahī dasht-navardī hogī
phir vahī paañv vahī ḳhār-e-muġhīlāñ hoñge

yārab ho ḳhair āmad-e-fasl bahār kī
dast-e-junūñ hai chāk-e-garebāñ liye hue

raqs-farmā huī vo sīm-tanī
be-zarī kī bahār ne dī thaap

merī ḳhizāñ to sabz huī is ḳhumār meñ
aane kā us ne va.ada kiyā hai bahār meñ

lagā ke siine se shādābiyoñ ko so jaatā
mujhe bahār-e-javānī meñ maut aa jaatī

bahār aa.ī zamāna huā ḳharābātī
hamāre dil meñ bhī ik lahr kaash aa jaatī

bahār-e-sad-chamanistān-e-ārzū ban kar
mire ḳhayāl kī rañgīniyoñ meñ aa.e jā

tamām umr tire intizār meñ hamdam
ḳhizāñ-rasīda rahā huuñ bahār kar mujh ko

mire ḳhayāl kī uljhan kahāñ sudhartī hai
gul-e-bahār ne dekhā hai phir sañvar ke mujhe

ai be-ḳhudi-e-dil mujhe ye bhī ḳhabar nahīñ
kis din bahār aa.ī maiñ dīvāna kab huā

bahār aa.ī hai bulbul dard-e-dil kahtī hai phūloñ se
kaho to maiñ bhī apnā dard-e-dil tum se bayāñ kar luuñ