Tags-Bahaar

kījiye chaak garebāñ ko bahār aa.ī hai
zikr be-lutf hai yaañ sabr o shakebā.ī kā

tujhe chhū kar bahār aa.ī thī
kunj-e-ġham meñ barsā thā

bahār aate hī kunj-e-qafas nasīb huā
hazār haif ki niklā na jo sila dil kā

maiñ aaj gulsitāñ meñ bulā luuñ bahār ko
lekin ye chāhtā huuñ ḳhizāñ ruuTh kar na jaa.e

junūñ ko dars-e-amal de ke kyā kare koī
ba-qadr-e-hausla-e-dil bahār bhī to nahīñ

naved-e-āmad-e-fasl-e-bahār bhī to nahīñ
ye be-dilī hai ki ab intizār bhī to nahīñ

'farīd' ahl-e-gulistāñ bhī hosh kho baiThe
kuchh is adā se hijāb-e-ruḳh-e-bahār uThā

hai ayaañ rū-e-yār ā.ankhoñ meñ
chhā.ī hai kyā bahār ā.ankhoñ meñ

fasl-e-gul ne laakh paidā kī fazā-e-pur-bahār
ġhuncha-e-dil par na aa.ī tāzgī tere baġhair

tujhe bahār milī mujh ko intizār milā
is intizār meñ lekin kise qarār milā

'sahar' is jahān-e-bahār-e-ḳhizāñ meñ
ḳhushī dā.imī hai na ġham jāvedānī

ḳhizāñ kā daur bhī aatā hai ek din 'kaifī'
sadā-bahār kahāñ tak daraḳht rahte haiñ

kuchh dil hī bujh gayā hai mirā varna aaj kal
kaifiyat-e-bahār kī shiddat chaman meñ thī

āñkhoñ meñ vo ḳhvāb nahīñ baste pahlā sā vo haal nahīñ hotā
ab fasl-e-bahār nahīñ aatī aur rañj o malāl nahīñ hotā

vo kahtā thā ḳhudā jaane bahār aa.e to kyā guzre
ḳhudā jaane bahār aa.ī to dīvāne pe kyā guzrī

luTī bahār kā sūkhā gulāb rahne do
hamārī āñkhoñ meñ koī to ḳhvāb rahne do

ḳhizāñ kā zikr to merī zabāñ pe thā hī nahīñ
bahār kartī hai mātam tire havāle se

hazār qaid-e-javāñ se chhuT kar bahār kā aasrā kareñge
bahār bhī ham qafas-zadoñ ko na raas aa.ī to kyā kareñge

josh-e-bahār aur ye be-iḳhtiyāriyāñ
sū-e-chaman chale the bayābāñ meñ aa ga.e

kyā hogā chaar phūloñ se ai mausam-e-bahār
ye to hamāre gosha-e-dāmāñ meñ aa ga.e