Tags-Bahaar

har phuul har kalī pe barastā hai ab lahū
rañgīnī-e-bahār-e-chaman kyā badal ga.ī

kuchh ḳhūn-e-vafā se kuchh hinā se
kyā rañg bahār ne liye haiñ

hazār rañg ḳhizāñ ne bahār ne badle
hazār ruup yahāñ rozgār ne badle

tujhe bahār kā ik murġh-e-ḳhush-navā samjhūñ
ki dard-mañd diloñ kī koī sadā samjhūñ

fasl-e-bahār aa.ī magar ham haiñ aur ġham
har samt se haiñ ghere hue sadma-o-alam

ye kyā zarūr ki nāmoñ ke ham-mizāj hoñ log
bahār aur ḳhizāñ naam haiñ zamānoñ ke

qadam qadam pe ye kahtī huī bahār aa.ī
ki raah band thī jañgal kī khol dī maiñ ne

raat yuuñ dil meñ tirī khoī huī yaad aa.ī
jaise vīrāne meñ chupke se bahār aa jaa.e

na sāz-o-mutrib na jām-o-sāqī na vo bahār-e-chaman hai baaqī
nigāh-e-sham-e-sahar ke parde ye naqsha-e-anjuman hai baaqī

ġhunchoñ ke dil bajā.e khilne ke shaq hue haiñ
ab ke baras na jaane kaisī bahār aa.ī

sindūr us kī maañg meñ detā hai yuuñ bahār
jaise dhanak nikaltī hai abr-e-siyāh meñ

dikhlā.eñ kis maze se ab ke bahār holī
khele haiñ sab jam.a ho kyā gul-ezār holī

hāthoñ se tire bahār-e-ḳhūbī
sharminda-e-barg-e-pāñ nahīñ ham

kyā hotā hai ḳhizāñ bahār ke aane jaane se
sab mausam haiñ dil khilne aur dil murjhāne se

vo bahār-afroz āñchal sad gulistāñ darkinār
vo bahisht-e-ārzū rañgīñ-qabā kal raat ko

agar dekheñ bahār-e-husn khil gul ke naman phūleñ
rahīñ haiñ muñd jaddā.ī ye ḳhizāñ siiñ juuñ kalī añkhiyāñ

yaad hai zamzama-e-sāz-e-bahār
shor-e-āvāz-e-ḳhizāñ yaad nahīñ

masarrateñ rāzdār-e-ġham thiiñ masarratoñ meñ alam thā pinhāñ
jabhī to sehn-e-chaman meñ shāyad bahār aa.ī ḳhizāñ se pahle

ho ḳhizāñ kyūñ-kar na gulshan kī bahār
jab yahāñ bād-e-sabā sar-sar chale

zaḳhm-e-dil par bahār dekhā hai
kyā ajab lāla-zār dekhā hai