Tags-Bahaar

bajā ki ḳhvāb haiñ lekin bahār kī rut meñ
ye tai hai ki ab ke hameñ bhī nihāl honā hai

ruḳhsār par numūd huā ḳhat ḳhabar bhī hai
ya.anī kamar kasī hai ḳhizāñ ne bahār par

kal nashāt-e-qurb se mausam bahār-andāza thā
kuchh havā bhī narm thī kuchh rañg-e-gul bhī taaza thā

aaj pītam ā.eñge aa.egī mere ghar bahār
dekh bigḌā to nahīñ ai aa.ine merā siñghār

bahār aate hī ḳhūñ-rezī huī vo sehn-e-gulshan meñ
ḳhajil kāñTe the yuuñ phūloñ ko josh-e-intiqām aayā

nafas nafas ho sabā kī tarah bahār-añgez
ufuq ufuq gul-e-hastī mahak mahak jaa.e

nazar ke kāñTe pe tul kar subuk hue na garāñ
tavāzun-e-nigah-e-nau-bahār meñ kyā thā

tirī vafā meñ mire intizār meñ kyā thā
ḳhizāñ ke dard meñ zaḳhm-e-bahār meñ kyā thā

kabhī ishq se kabhī pyaar se
kabhī mausamoñ kī bahār se

hai bahār-e-gul-o-lāla mire ashkoñ kī numūd
merī āñkhoñ ne khilā.e haiñ gulistāñ kyā kyā

ab bhī chāho to tum palaT aao
ab bhī thoḌī bahār baaqī hai

adā se aa.ī chaman meñ adā se lauT ga.ī
guloñ pe biit ga.ī kyā bahār kyā jaane

ġham ko dil kā qarār kar liyā jaa.e
is ḳhizāñ ko bahār kar liyā jaa.e

guloñ kī surḳh rañgat jism meñ lauke lagātī hai
dikhātī hai tamāshā kis kī āñkhoñ ko bahār apnā

ilāhī ḳhair ho ab ke bahār-e-bāġh ne phir bhī
jamāyā be-tarah bulbul ke dil par e'tibār apnā

bahār aa.ī to khul kar kahā hai phūloñ ne
ye kis ne chheḌ dī gulshan meñ phir jamāl kī baat

mujh ko qadam qadam pe tirā intizār hai
shāyad ki mere vāste fasl-e-bahār hai

har saal bahār se pahle maiñ paanī par phuul banātā huuñ
phir chāroñ mausam likh jaate haiñ naam tumhārā āñkhoñ meñ

parda-e-jāñ meñ nigār-e-dil-sitāñ rakhte the ham
gulshan-e-dil meñ bahār-e-be-ḳhizāñ rakhte the ham

dhokā thā nigāhoñ kā magar ḳhuub thā dhokā
mujh ko tirī nazroñ meñ mohabbat nazar aa.ī