Tags-Bahaar

phir shāḳh-e-dil pe gul na.e ummīd ke khile
mausam bahār-e-tāza kā aayā hai barsoñ ba.ad

rindān-e-tishna-kām ko jā kar ḳhabar kareñ
aa.ī bahār abr-e-karam par nazar kareñ

kuchh apne dil par bhī zaḳhm khaao mire lahū kī bahār kab tak
mujhe sahārā banāne vaalo maiñ laḌkhaḌāyā to kyā karoge

qafas se chhoḌe hai ab mujh ko kyā tū ai sayyād
chaman ke biich kahāñ mausam-e-bahār rahā

qātil mire lahū ne bhī kyā gul khilā.e haiñ
dāman pe tere dete haiñ kyā hī bahār daaġh

dete haiñ mere siine meñ kyā hī bahār daaġh
khaa.e na un ko dekh ke kyuuñ lāla-zār daaġh

ġhunche ġhunche pe gulistāñ ke nikhār aa jaa.e
jis taraf se vo guzar jaa.eñ bahār aa jaa.e

mai-kade kī ye udāsī nahīñ dekhī jaatī
nahīñ ma.alūm hai kyā der bahār aane meñ

ma.aal kyā hogā bāġhbāno sukūñ-farāmosh irtiqā kā
nazar bhī aane lagī chaman meñ bahār-e-bāġh-e-iram hī achchhā

bāhar chahak rahī ho ki andar mahak rahī
dil ab kisī bahār kā qaa.il nahīñ rahā

mire chaman meñ ḳhizāñ rakh chukī qadam lekin
mire ḳhayāl ko miltī bahār kam-az-kam

shagufta rahtī hai ḳhātir hamesha
qanā.at bhī bahār-e-be-ḳhizāñ hai

tere aane se yū ḳhushī hai dil
juuñ ki bulbul bahār kī ḳhātir

riyāz-e-ishq meñ aisī bhī ik bahār aa.ī
nigāh-e-shauq ne bose kalī kalī ke liye

gulchīñ bahār-e-gul meñ na kar man.a sair-e-bāġh
kyā ham ġhubār dāman-e-bād-e-sabā ke haiñ

ab kahāñ jā.eñge ḳharāb-e-bahār
āshiyāñ bhī nahīñ qafas bhī nahīñ

bijlī kī zad meñ aa gayā fasl-e-bahār meñ
al-muḳhtasar yahī hai mere āshiyāñ kā haal

kyā din the jab nazar meñ ḳhizāñ bhī bahār thī
yuuñ apnā ghar bahār meñ vīrāñ na thā kabhī

zer-e-lab hai abhī tabassum-e-dost
muntashir jalva-e-bahār nahīñ