Tags-Bahaar

ab ke bahār-e-husn-e-butāñ hai kamāl par
nāqūs ho na jaa.e kaf-e-barhaman meñ phuul

bahār ho ga.ī phir apne-āp sharminda
kiyā thā dil ne bhī vo intiḳhāb mausam kā

shaguft-e-taba ke sāmān-o-sāz haiñ nāpaid
sabā nahīñ chamanistāñ nahīñ bahār nahīñ

nashemanoñ kī muḳhālif na thī bahār-e-chaman
magar sharārat-e-īmā-e-bāġhbāñ hogī

agar mumāniyat-e-sair-e-gulistāñ hogī
to phir bahār hameñ rū-kash-e-ḳhizāñ hogī

havā-e-aks-e-bahār-o-ḳhizāñ nahīñ hai faqat
agar nigāh karo phuul paat se aage

uTho ki jashn-e-ḳhizāñ ham manā.eñ jī bhar ke
bahār aa.e gulistāñ meñ kab ḳhudā jaane

phir bahār aa.ī hai jī umDā hai yād-e-dost meñ
dil kare zaarī aur āñkheñ ashk-bārī in dinoñ

aah ye barsāt kā mausam ye zaḳhmoñ kī bahār
ho gayā hai ḳhūn-e-dil āñkhoñ se jaarī in dinoñ

laġhzishat-e-mastāna o josh-e-tamāshā hai 'asad'
ātish-e-mai se bahār-e-garmī-e-bāzār-e-dost

maiñ jo ai 'shād' na ro.uuñ sifat abr-e-bahār
paa.eñ ik qatra kahīñ jhiil na jhābaḌ paanī

tū hai rañg-e-nargis-o-nastaran hai tujhī se raunaq-e-anjuman
tire muntazir haiñ gul-o-saman to bahār ban ke chaman meñ aa

ye bahār-e-bāġh ye mahfileñ tirī ḳhalvatoñ pe nisār hoñ
tujhe kaam ġhuncha-o-gul se kyā tū chaman ko chhoḌ ke ban meñ aa

us gul ne jaane kyā mire baare meñ kah diyā
guzrī hai mujh se kaT ke nasīm-e-bahār aaj

kis mast kī duā huī maqbūl-e-bārgāh
aayā hai jhuum jhuum ke abr-e-bahār aaj

tumhārā lams mo.attar tumhārā jism bahār
yahī to bahs gulāboñ ke rū-ba-rū Thahrī

kabhī bahār kabhī gul kabhī subū Thahrī
vo aañkh jo kisī jannat kī āb-jū Thahrī

ye vāqi.a hai ki is baar to bahār ke ba.ad
khilā hai gulshan-e-ummīd aur kamāl khilā

ḳhizān-e-umr kujā o kujā bahār-e-shabāb
falak ko rashk huā koī jab javāñ dekhā

kuchh aisī adāoñ se gulshan meñ bahār i
shabnam ne ġhazal chheḌī phūloñ ko hañsī i