Tags-Bahaar

nuqūsh-e-pā se hamāre uge haiñ laala o gul
rah-e-bahār se ham be-nishāñ nahīñ guzre

dil par bhī aao ek nazar Dālte chaleñ
shāyad chhupe hue hoñ yahīñ din bahār ke

gulshanoñ meñ haiñ urūsān-e-bahār ārāsta
gulban-o-naḳhl-o-nihāl-o-shāḳhsār ārāsta

kal bhī ruḳh-e-hayāt par rañg-e-shaguftagī na thā
sub.h-e-bahār-e-zindagī shām-e-ḳhizāñ hai aaj bhī

vābasta-e-bahār ho ḳhud misl-e-rañg-o-bū
yuuñ zindagī guzār kisī gul-e-badan ke saath

yahāñ kabhī bhī ḳhizāñ kā guzar nahīñ hogā
yahāñ hamesha rahegā bahār kā mausam

maiñ us gulāb ko nārāz kar nahīñ saktā
bhale hī ruuTh ke jaa.e bahār kā mausam

bahār aa.ī hai sote ko Tuk jagā denā
junūñ zarā mirī zanjīr ko hilā denā

ḳhayāl ke phuul khil rahe haiñ bahār ke giit gā rahā huuñ
tire tasavvur kī sarzamīñ par na.e gulistāñ khilā rahā huuñ

jab ham hī fasl-e-gul meñ chaman se nikal ga.e
phir kyuuñ sunā rahe ho kahānī bahār kī

fasl-e-bahār aa.ī hai kapḌoñ ko phāḌiye
dil ke buḳhār dast-o-garebāñ se duur hoñ

nazdīk aa chukī hai savārī bahār kī
barg-e-ḳhizāñ-rasīda gulistāñ se duur hoñ

gar chāhe gulshan-e-dil-e-pur-dāġh kī bahār
tū tuḳhm-e-ashk jitne ki ai diida bo sake

ik sub.h jab bahār thī kamre meñ mez pe
phūloñ ke rañg chaa.e kī ḳhushbū se tez the

fatvā diyā hai muftī-e-abr-e-bahār ne
tauba kā ḳhuun bāda-kashoñ ko halāl hai

rishte siiñ mauj-e-gul kī havā-e-bahār meñ
sab bulbuloñ kā chāk-garebāñ rafū huā

le gayā vo saath apne gulshan-e-dil kī bahār
suunī suunī hai mirī mahfil kise āvāz duuñ

hai bāġh-e-tamannā kī bahār apnī jagah ḳhuub
gul apnī jagah ḳhuub haiñ ḳhaar apnī jagah ḳhuub

chāk-dil chāk-jigar chāk-garebāñ vaale
misl-e-gul aate haiñ mānind-e-bahār aate haiñ

kabhī kabhī to hameñ bhī yaqīñ nahīñ aatā
ki ham bahār meñ jalte gulāb dekhte haiñ