Tags-Bahaar

pas-manzar-e-bahār se ham be-ḳhabar na the
raas aa sakī na ḳhanda-e-gul kī sadā hameñ

dil-e-ḳhūñ-gashta-e-hasrat ne kyā kuchh gul khilā.e haiñ
bahār-āgīñ hai kuchh ab kī baras fasl-e-ḳhizāñ kyā kiyā

gul-afshānī ke dam bhartī hai chashm-e-ḳhūñ-fishāñ kyā kyā
hamāre zeb-e-dāman hai bahār-e-gulsitāñ kyā kyā

ye rañg-o-bū ke tilismāt kis liye haiñ 'surūr'
bahār kyā hai junūñ kī jo parvarish hī nahīñ

ik sabz shāḳh gulāb kī thā ik duniyā apne ḳhvāb kī thā
vo ek bahār jo aa.ī nahīñ us ke liye sab kuchh haar diyā

ham ne khilte dekhnā hai phir ḳhayabān-e-bahār
shahr ke atrāf kī miTTī meñ sonā hai abhī

visāl-e-dā.imī kā hai tasavvur
bahār-e-be-ḳhizāñ hai aur maiñ huuñ

bahār-e-lāla-o-gul barq-e-be-amāñ niklī
kahāñ kahāñ na rahī mere āshiyāñ kī talāsh

mire bāġh-e-dil pe āḳhir ye bahār bhī sitam hai
jo gulāb ham ne bo.e vo haiñ ḳhār-dār ab tak

chashm-e-bad duur ho nazar na kahīñ
hai nipaT hī bahār āñkhoñ meñ

duā.eñ kījiye ġhunchoñ ke muskurāne kī
abhī umiid hai baaqī bahār aane kī

hai mirī nazroñ meñ anjām-e-bahār-e-gulsitāñ
ab mire sar meñ havā-e-gul badāmānī nahīñ

aatī ḳhizāñ meñ bikhre haiñ murjhā.e chand phuul
ujḌā huā chaman hai ye jaatī bahār hai

jān-e-bahār tum ne vo kāñTe chubho.e haiñ
maiñ har gul-e-shagufta ko chhūne se Dar gayā

bahār shabnam-āsūda thī ki rūh-e-ḳhalīl
faroġh-e-lāla-o-gul thā ki ātish-e-namrūd

munhasir jis par azal se kārobār-e-naġhma hai
dard kī āñkhoñ meñ vo ḳhvāb-e-bahār-e-naġhma hai

phir bahār aa.ī hai gulshan kā nazāra kar lo
varna ye vaqt suhāna bhī badal jā.egā

dikhlā.eñge bahār kalām-e-fasīh kī
gar dahr meñ 'shagufta' koī qadar-dāñ huā

ghūreñge kyā guloñ ko gulistān-e-dahr meñ
ruḳhsat huī bahār nuzūl-e-ḳhizāñ huā

naam bhī lenā hai jis kā ik jahān-e-rañg-o-bū
dosto us nau-bahār-e-nāz kī bāteñ karo