Tags-Bahaar

āḳhir huī bahār magar rañg-e-gul kā ḳhvāb
dil meñ duā nigāh meñ shabnam sā rah gayā

zakāt de zar-e-gul kī bahār meñ gulchīñ
chaman meñ phuul luTā ashrafī ke zar kī tarah

bahār aa.e muzhda masarrat kā le kar dhuāñ-dhār uTThīñ falak par ghaTā.eñ
idhar jaam chhalke udhar tauba TuuTe baham zohd-o-rindī meñ ho hāthā-pā.ī

tujh meñ kab husn-e-bahār-e-gul kī ra.anā.ī na thī
kab tire jalvoñ kī ik duniyā tamāshā.ī na thī

bheroñ kī guuñj mast hai har kisht-zār meñ
bansī bajāte kishn hai goyā bahār meñ

sarsoñ ke lahlahāte haiñ khet is bahār meñ
nargis ke phuul phuul uThe lāla-zār meñ

haiñ chūḌiyoñ kī joḌ basantī kalā.ī meñ
ban ke bahār aa.ī hai dast-e-hinā.ī meñ

saaqī kuchh aaj tujh ko ḳhabar hai basant kī
har sū bahār pesh-e-nazar hai basant kī

kesar kusūm kī ḳhuub dil-afzā bahār hai
geñdoñ kī har chaman meñ do-rūya qatār hai

basne ko chal tū dasht-e-ḳhizāñ-dīda meñ 'shabāb'
gulzār meñ bahār-e-gul-o-nastaran ko chhoḌ

patte nahīñ kahīñ harī shāḳh-e-shajar nahīñ
is shahr meñ bahār kī koī ḳhabar nahīñ

sahrā ho sehn-e-bāġh ho yā kohsār ho
saaqī jahāñ pilā.e vahīñ par bahār ho

yuuñ to ḳhabar hai āmad-e-fasl-e-bahār kī
lekin nasīb meñ bhī to lutf-e-bahār ho

gul-kārī-e-chaman meñ hamārā lahū bhī hai
rañgīnī-e-bahār meñ shāmil hamī to haiñ

jo bechne chale haiñ matā-e-bahār ko
un dushmanoñ ke madd-e-muqābil hamī to haiñ

zarre zarre se gulistāñ meñ barastī hai bahār
kaun aise meñ sambhāle tire dīvāne ko

kuchh phuul haath par mire kuchh ḳhaar jism meñ
'saulat' ye kis bahār kā mausam rahā huuñ maiñ