Tags-Bahaar

kuchh is adā se safīrān-e-nau-bahār chale
salīb dosh pe rakh kar gunāhgār chale

luTtī hai qaid-e-zulf meñ kyā kyā bahār-e-husn
tah meñ asīrīyoñ kī haiñ kyā kyā rihā.iyāñ

mil hī jā.egī kahīñ DhūñDhne vaale ko bahār
har gulistāñ meñ ḳhizāñ ho ye zarūrī to nahīñ

kah do bahār aa.e
dāman ba-dast huuñ maiñ

jo mere dasht-e-junūñ meñ thā farq-e-rū-e-bahār
vahī ḳhirad ke ḳharābe meñ ik gulāb banā

chaman meñ zindagānī ke bahār aa.ī ḳhizāñ ban kar
mohabbat ne lagā.ī aag dil ko naujavānī meñ

fitrat udaas sī hai ghaTā.eñ haiñ sogvār
ik ġham-nasīb husn hai abr-e-bahār meñ

sāvan kī rut bahār kā mausam añdherī raat
rim-jhim ke giit guuñj rahe haiñ phuvār meñ

ye chāñd ye bahār kī rāteñ gavāh haiñ
ham ab bhī apne ghar meñ haiñ mehmān kī tarah

apnī bahār dekh ke hairān rah ga.e
vāqif hue haiñ jab se rumūz-e-ḳhudī se ham

aaj yuuñ mauj-dar-mauj ġham tham gayā is tarah ġham-zadoñ ko qarār aa gayā
jaise ḳhush-bū-e-zulf-e-bahār aa ga.ī jaise paiġhām-e-dīdār-e-yār aa gayā

rut badalne lagī rañg-e-dil dekhnā rañg-e-gulshan se ab haal khultā nahīñ
zaḳhm chhalkā koī yā koī gul khilā ashk umDe ki abr-e-bahār aa gayā

bahār aa.e chaman meñ ye intizār na dekh
'shakīl' apne junūñ kī bahār kyā kam hai

qafas se aa.e chaman meñ to bas yahī dekhā
bahār kahte haiñ jis ko ḳhizāñ kā aalam hai

sunā hai us ne ḳhizāñ ko bahār karnā hai
ye jhuuT to hai magar e'tibār karnā hai

saaqī bahār dar-kaf phuul aa.e mai-kade se
tūfān uTh rahā hai gulshan meñ rañg-o-bū kā

aa.ī hai kaaT ke mī.ād-e-asīrī kī bahār
hatkaḌī khul ke girī jaatī hai dīvāne kī

'riyāz' tauba karo din ḳhizāñ ke aa.e haiñ
tum aa.e piine ko jaatī huī bahār meñ kyā

uḌāne phuul hasīñ aa.e haiñ bahār meñ kyā
lagī hai aag sī ye aaj lāla-zār meñ kyā

nayā khilā hai shagūfa koī bahār meñ kyā
guñdhā huā hai mirā dil kisī ke haar meñ kyā