Tags-Bahaar

mastī meñ faroġh-e-ruḳh-e-jānāñ nahīñ dekhā
sunte haiñ bahār aa.ī gulistāñ nahīñ dekhā

kuchh faisla na ho sakā ab kī bahār meñ
dāman ko taar taar kareñ yā rafū kareñ

un ke liye gul-o-bahār aur hameñ ḳhizāñ-o-ḳhār
un ko bhī gulsitāñ mile ham ko bhī gulsitāñ mile

ḳhizāñ kā zikr hī kyā hai ki ai 'ravish' ham ne
bharī bahār guzārī hai gulistāñ se alag

lāla-rū phir bahār aa.ī hai
kyuuñ na hue phuul kī farāvānī

is adā se kaun ye jalva-gar sar-e-bazm-e-husn-e-ḳhayāl hai
jo nafas hai mast-e-bahār hai jo nazar hai ġharq-e-jamāl hai

ye zindagī badalte mausamoñ kā rañg-rūp hai
kabhī bahār kā samāñ kabhī ḳhizāñ liye hue

sun to rahe haiñ der se shor bahut bahār kā
jaane kahāñ khile haiñ phuul jaane kahāñ bahār hai

bahār kī dhuup meñ nazāre haiñ us kināre
safed paanī ke sabz dhāre haiñ us kināre

merī havas ke andarūñ mahrūmiyāñ haiñ dost
vāmāñda-e-bahār huuñ ghaTiyā kahe so huuñ

ḳhizāñ ke jaate hī rut kā pāñsa palaT gayā hai
bahār kī ḳhushbuoñ se gulshan kā zarra zarra mahak rahā hai

bulbul ne kī bahār meñ kis yaas se ik aah
chāk-e-qafas se dekh ke gulzār kī taraf

vo jo apne saath laayā thā gulistāñ kī bahār
jā rahā hai ab kahāñ vo ghar ko vīrāñ chhoḌ kar

sayyād mere tā.ir-e-dil ne qafas ko bhī
nāloñ se pur-bahār kiyā hai kabhī kabhī

añgḌā.ī le rahī thī gulistāñ meñ jab bahār
har phuul apne rañg kī ātish meñ jal gayā

vo jān-e-nau-bahār jidhar se guzar gayā
peḌoñ ne phuul pattoñ se rasta chhupā liyā

bulbul ko bāġhbāñ se na sayyād se gila
qismat meñ qaid likkhī thī fasl-e-bahār meñ

kāñToñ ko mat nikāl chaman se o bāġhbāñ
ye bhī guloñ ke saath pale haiñ bahār meñ

ḳhizāñ to ḳhair se guzrī chaman meñ bulbul kī
bahār aa.ī hai ab āshiyāñ rahe na rahe