Tags-Bahaar

us ko patā nahīñ hai ḳhizāñ ke mizāj kā
vo vāqif-e-bahār huā hai abhī abhī

har rasta pur-bahār huā hai abhī abhī
dil dil kā rāzdār huā hai abhī abhī

mirī hasratoñ ke dayār meñ tirī justujū se bahār hai
tirā naqsh-e-pā hai jahāñ kahīñ hai jabīn-e-shauq vahīñ mirī

koī shitāb ḳhabar lo ki be-namak hai bahār
chaman ke beach divānoñ kā ab ke shor nahīñ

is ek baat se gulchīñ kā dil dhaḌaktā hai
ki ham sabā se hadīs-e-bahār kahte haiñ

ra.anā.ī-e-bahār baḌhāne ke vāste
terā jamāl terī adā māñgtā huuñ maiñ

use bahār kī rañgīniyāñ nasīb na hoñ
chaman meñ rah ke chaman kā jo haq adā na kare

chaman vahī hai ghaTā.eñ vahī bahār vahī
magar guloñ meñ vo ab rañg-o-bū nahīñ baaqī

ye tilism-e-mausam-e-gul nahīñ ki ye mojaza hai bahār kā
vo kalī jo shāḳh se gir ga.ī vo sabā kī god meñ pal ga.ī

jis ne tirī ḳhizāñ ke aise nikhār dekhe
gulzār-e-ḳhuld kī phir vo kyā bahār dekhe

kabhī raushan jo huī sham-e-bahār
baaġh kī be-basarī yaad aa.ī

misāl miltī hai kitnoñ kī us divāne se
chaman se duur jo baiThā ġham-e-bahār kare

maiñ apne andar kī bahār
'bānī' kyā bāhar merā

maiñ vo dīvāna huuñ jab fasl-e-bahār aatī hai
mere vīrāne meñ pariyoñ kā guzar rahtā hai

ye pās-e-bahār ashk piye jo dard baḌhā to sher kahe
batā.eñ kise hamārī tabāhiyoñ kī adā ajiib sī hai

zindāniyoñ ko aa ke na chheḌā kare bahut
jān-e-bahār nik.hat-e-rusvā kaheñ jise

aa ai bahār-e-nāz ki tere ḳhirām se
dastār gird-e-shāḳh-e-gul-e-naqsh-e-pā karūñ

bahār ab ke jo guzrī to phir na aa.egī
bichhaḌne vaale bichhaḌte samay ye kah ga.e haiñ

baḌh gayā aur bhī junūñ 'afqar'
aa ke fasl-e-bahār ne maarā

tamhīd thī junūñ kī garebāñ huā jo chaak
ya.anī ye ḳhair-maqdam-e-fasl-e-bahār thā