Tags-Bharosa

bharosa had se sivā thā mujhe kabhī jis par
mire ḳhilāf hai shāmil vahī gavāhoñ meñ

ghar se niklo to duā maañg ke niklo varna
lauT aane kā nahīñ apne bharosa koī

bharosa rakhoge ḳhudā pe jo apne
to kashtī samundar se bhī paar hogī

jo bande ḳhudā ke ḳhudā par na rakkheñ to rakkheñ bharosa ḳhudā.ī meñ kis par
banāyā unheñ ahl-e-hājat usī ne karegā vahī un kī hājat-ravā.ī

hameñ ḳhudā pe bharosa hai nā-ḳhudā pe nahīñ
ḳhudā jo detā hai vo nā-ḳhudā nahīñ detā

nafas kī āmad-o-shud kā bharosa kuchh nahīñ 'sho.ala'
payām-e-maut le kar ḳhud hayāt-e-musta.ār aa.ī

iqlīm-e-ma.ānī meñ amal ho gayā merā
duniyā meñ bharosa thā kise tāj-o-nagīñ kā

terī kis baat kā bharosa ho
terī har baat jaan hai goyā

apne aap se Darne vaalā
kis pe bharosa kar saktā hai

sāmrāj apne vasīloñ pe bharosa na kare
kohna zanjīroñ kī jhankāreñ nahīñ rah saktīñ

ab uḳhuvvat pe bharosa nahīñ kartī duniyā
āgahī niyyat-e-qābīl tak aa pahuñchī hai

sheb aayā ab to 'afrīdī' samajh
kyā bharosa dam kā hai aayā gayā

umr bhar saath nibhāne kā karūñ kyā va.ada
zindagī ab to mujhe ḳhud pe bharosa bhī nahīñ

va.ada-e-hashr kā bharosa kyā
haañ hai be-kār huuñ hai be-ma.anī

dosto merī tabī.at kā bharosa kuchh nahīñ
hañste hañste aañkh meñ rañg-e-malāl aa jā.egā

'sharar' maiñ aisī miTTī par asās-e-fan nahīñ rakhtā
rasānoñ kā bharosa kyā rasāneñ ghaTtī baḌhtī haiñ

maiñ tum par har baar bharosa kartā huuñ
itnā sachchā jhūTh tumhārā hotā hai

koī bharosa nahīñ abr ke barasne kā
baḌhegī pyaas kī shiddat na āsmāñ dekho

is par bhī ham luTāte rahe daulat-e-yaqīñ
ik pal bhī jis ne ham pe bharosa nahīñ kiyā

merī dīvāngī bharosa rakh
maiñ ne paanī ko bhī ġhubār kiyā