Tags-Chaand

rātoñ kī hai taqdīr tirā chāñd sā chehra
nazroñ meñ hai tasvīr tire nain kañval se

dīvāna-vār chāñd se aage nikal ga.e
Thahrā na dil kahīñ bhī tirī anjuman ke ba.ad

chāñd utrā nahīñ ab tak bhī zamīñ par 'shabnam'
ek muddat huī dete haiñ sadā.eñ ham log

chāñdnī jis kī dar-e-jāñ pe ham aksar dekheñ
kabhī us chāñd ko bhī haath se chhū kar dekheñ

bujhā diyā hai nasīboñ ne mere pyaar kā chāñd
koī diyā mirī palkoñ pe ab jalā na kare

kyā chāñd aur tāroñ ko ham jānte nahīñ
ai āsmān vaalo zamīñ par rahe haiñ ham

raat bhar chāñd se hotī raheñ terī bāteñ
raat khole haiñ sitāroñ ne tire raaz bahut

chāñd ḳhud vasl kī kare ḳhvāhish
ye kamāl aate aate aatā hai

chāñd nashe meñ thā
aur samundar se

jhiil ne apne siine par yuuñ Taañk liyā
jaise maiñ āvāra chāñd gagan kā thā

ḳhirman-e-zulm ko ab aag lagā de koī
chāñd-tāroñ ke charāġhoñ ko bujhā de koī

vo rāteñ chāñd ke saath ga.iiñ vo bāteñ chāñd ke saath ga.iiñ
ab sukh ke sapne kyā dekheñ jab dukh kā sūraj sar par ho

ye chāñd taare mire gird raqs karte the
likhā huā hai zamīñ kā madār maiñ bhī thā

us ke chehre kī chamak ke sāmne saada lagā
āsmāñ pe chāñd puurā thā magar aadhā lagā

chāñd meñ tū nazar aayā thā mujhe
maiñ ne mahtāb nahīñ dekhā thā

sach to ye hai qusūr apnā hai
chāñd ko chhūne kī tamannā kī

kabhī chāñd-chehroñ kī bhiiḌ se jo nikal ke aayā to ye khulā
vo jo asl thā use kho diyā jise pā liyā koī aur hai

chāñd-tāroñ kī tarah maiñ bhī huuñ gardish meñ 'rashīd'
haañ agar tū ne pukārā to Thahar jā.ūñgā

raat hī ke dāman meñ chāñd bhī haiñ taare bhī
raat hī kī qismat hai be-charāġh honā bhī

kohar kohsār raat terā saath
chāñd niklā nayā nayā kaisā