Tags-Chaand

tum apnā chāñd ḳhushī se tamām shab dekho
hamārā kaam sitāre shumār karnā hai

chāñd meñ bastiyāñ basā lenā
mujh ko DhūñDho ki maiñ bhī duniyā huuñ

chāñd kī nazr kiye maiñ ne nazar ke sajde
husn-e-ma.asūm ke jalvoñ kā parastār rahā

usī ke dam se thā raushan sipāh-e-shab kā alam
vo chāñd jis ko zamīñ meñ dabā diyā gayā hai

fāsla chāñd banā detā hai har patthar ko
duur kī raushnī nazdīk to aane se rahī

ye man kartā hai bādal aa ke Dhak leñ chāñd ko puurā
hoñ jab vo paas to phir chāñdnī achchhī nahīñ lagtī

ḳhalā-navardoñ kī manzil nahīñ paḌāv hai
misāl chāñd kī 'siprā' sarāoñ jaisī hai

jis meñ the chāñd taare mahbūb the hamāre
kyuuñ vo nigār-ḳhāna phir yaad aa rahā hai

'rahmat' charāġh-e-ḳhāna-e-darvesh hai hayāt
yā-rab! koī to chāñd sā chehra dikhā.ī de

is se pahle ye kabhī dil ne kahā hī kab thā
raat kuchh aur baḌhe chāñd dobāra nikle

qumqumoñ kī aañch ne pighlā diye manzar tamām
chāñd ab koī kisī bhī baam par miltā nahīñ

hameñ har aane vaalā zaḳhm-e-tāza de ke jaatā hai
hamāre chāñd sūraj aur sitāre ek jaise haiñ

tumhārī bazm se nikle to ham ne ye sochā
zamīñ se chāñd talak kitnā fāsla hogā

Dastī haiñ sūraj kī kirneñ chāñd jalā.e jaan
pag pag maut ke gahre saa.e jīvan maut samān

abhī tāroñ se khelo chāñd kī kirnoñ se iThlāo
milegī us ke chehre kī sahar āhista āhista

zaḳhm-e-dil dāġh-e-jigar dāġh-e-tamannā kī qasam
chāñd se phuul se Dar ham ko yahāñ hotā hai

raat sunsān dasht o dar ḳhāmosh
chāñd taare shajar hajar ḳhāmosh

vo chāñd chehre vo bahkī bāteñ sulagte din the mahaktī rāteñ
vo chhoTe chhoTe se kāġhazoñ par mohabbatoñ ke payām likhnā

na chāñd meñ hai vo chehra na sarv meñ hai vo jism
gayā vo shaḳhs to us kī shabāhateñ bhī ga.iiñ

tum apne chāñd taare kahkashāñ chāhe jise denā
mirī āñkhoñ pe apnī diid kī ik shaam likh denā