Tags-Charagh

abhī javānī pe haiñ umañgeñ diloñ meñ haiñ saiñkaḌoñ tarañgeñ
jo do charāġh aaj bujh rahe haiñ to das charāġh aur jal rahe haiñ

ā.īne ke visāl se raushan huā charāġh
par lau se is charāġh kī ā.īna jal paḌā

ham aise log us kī anjuman meñ
charāġh-e-dil jalāne ke liye haiñ

bil-āḳhir kam paḌegā ye añdherā
charāġh itne jalāne ke liye haiñ

ye kaun merī tishnagī baḌhā baḌhā ke chal diyā
ki lau charāġh-e-dard kī baḌhā baḌhā ke chal diyā

ab tez havā kitnī hī chale ab garm fazā kitnī hī rahe
siine kā zaḳhm charāġh banā dāman kī aag bahār huī

dil meñ shagufta gul bhī haiñ raushan charāġh bhī
kyā chiiz haiñ ye soz-e-mohabbat ke daaġh bhī

ā.īne meñ aks Dhal rahā hai
paanī meñ charāġh jal rahā hai

ḳhud bhī maiñ jal rahā huuñ jalā kar
tāq-e-jāñ meñ charāġh āgahī ke

zavāl-e-shab tak vo rafta rafta charāġh tanhā jo jal rahā hai
vo pal ki jis kā maiñ muntazir thā vo dekho manzar badal rahā hai

DhūñDeñgī ba.ad mere mujh ko charāġh le kar
vo mahfileñ ki jin meñ 'sāqib' ġhazal-sarā thā

māh-e-nau bas ek tū hī to nahīñ tere sivā
qarya-e-shab meñ charāġh-e-jāñ-fishāñ merā bhī hai

charāġh bāñTne vāloñ pa hairateñ na karo
ye āftāb haiñ, shab kī duā meñ shaad raheñ

maiñ is charāġh ko dushman kī saf meñ kyuuñ rakhkhūñ
ye mere naam pe kuchh der ko jalā bhī hai

maiñ rab ke nuur se mahv-e-kalām huuñ sar-e-shām
sū-e-charāġh-e-duā tū bhī darmiyāñ se nikal

is añdhere meñ jalte chāñd charāġh
rakhte kis kis kā vo bharam hoñge

tasavvur us sanam kā hai hameñ ka.abe se kyā matlab
charāġh apnā hai dāġh-e-dil hai jo mandir meñ jaltā hai

charāġh to haiñ magar itne dhuñdle dhuñdle kyuuñ
'kiran' tumhāre to ye naqsh-e-pā nahīñ hote

kahīñ hue bhī jo raushan mohabbatoñ ke charāġh
havā.eñ dauḌ paḌīñ vahshatoñ ke daam liye

dil hī to ek dair-o-haram kā charāġh thā
dil bujh gayā to phir na kahīñ raushnī huī