Tags-Charagh

ho nahīñ saktā siyah-kārī se maiñ raushan-zamīr
dil mirā ik zarf ma.asūd-e-charāġh-e-kushta hai

go huuñ muflis par huuñ apnī tīra-baḳhtī se namī
mere ghar meñ daulat-e-sūd-e-charāġh-e-kushta hai

har har qadam charāġh kahāñ tak jalāo.ge
tārīkiyāñ to din kī bhī vārid haiñ raat par

mujhe yaad aa rahe haiñ vo charāġh jin ke saa.e
kabhī dostoñ ke chehre kabhī daaġh raftagāñ ke

maiñ jinheñ fareb samjhūñ tirī yād-e-mehrbāñ ke
vo charāġh bujh ga.e haiñ mirī umr-e-jāvedāñ ke

suḳhan kiyā jo ḳhamoshī se shā.erī jaagī
charāġh lafzoñ ke jal uTThe raushnī jaagī

shab-e-intizār kī kashmakash meñ na pūchh kaise sahar huī
kabhī ik charāġh jalā diyā kabhī ik charāġh bujhā diyā

uTThe vo dūd-e-dil ki falak ho gayā siyāh
gul ho ga.e charāġh mah-o-āftāb ke

yahī charāġh hai sab kuchh ki dil kaheñ jis ko
agar ye bujh gayā to aadmī bhī parchhā.īñ

charāġh le ke mujhe DhūñDne nikaltā thā
mire baġhair na rahtā thā ham-suḳhan merā

ajiib nuur se rishta thā nuur kā aḳhtar
ka.ī charāġh jale kahkashāñ ke hote hue

badan ki jaise havāoñ kī zad meñ koī charāġh
ye apnā haal thā ik mehrbāñ ke hote hue

kabhī jalāte nahīñ ham to barhamī kā charāġh
vo dushmanī kī ravish roz aam karte haiñ

mujhī meñ raushan charāġh-e-naġhma magar abhī tak
mujhe gumāñ hai ki parda-e-sāz boltā hai

na.e daur ke na.e ḳhvāb haiñ na.e mausamoñ ke gulāb haiñ
ye mohabbatoñ ke charāġh haiñ inheñ nafratoñ kī havā na de

pindār-e-sar-nigūñ kā junūñ mo'atabar nahīñ
bujhte hue charāġh kī lau tez karke dekh

raushan-zamīr aaj bhī zulmat-nasīb haiñ
tum ne diye haiñ pūchh ke nām-o-nasab charāġh

tiira hai ḳhāk-dāñ to falak be-nujūm hai
laa.e kahāñ se maañg ke dast-e-talab charāġh

vo din nahīñ kiran se kiran meñ lage jo aag
vo shab kahāñ charāġh se jalte the jab charāġh

ai bād-e-tund vaz.a ke pāband ham bhī haiñ
patthar kī oT le ke jalā.eñge ab charāġh