Tags-Charagh

nazreñ milīñ charāġh jale raushnī huī
lau de uThī phir apnī tabī.at bujhī huī

maiñ sochtā huuñ agar is taraf vo aa jaatā
charāġh-e-umr kī lau ik zarā baḌhā jaatā

charāġh-e-dil jalā rakkhā thā āb-o-tāb se ham ne
havā-e-ġham chalī hogī tabhī to ye bujhā hogā

āñkhoñ kā lams jism ke hāthoñ meñ sauñp kar
us ne charāġh gul kiyā aadhā jalā huā

chalo charāġh bujhā kar zarā sā dekheñ ham
ye kā.enāt kise DhūñDne nikaltī hai

koī tīrgī hai furāt-e-jāñ meñ ravāñ-davāñ
magar ik charāġh sā tairtā hai nigāh meñ

charāg chāñd shafaq shaam phuul jhiil sabā
churā.īñ sab ne hī kuchh kuchh shabāhateñ terī

mire vajūd ne kyā kyā libās badle haiñ
kahīñ charāġh kahīñ rāste kā patthar huuñ

daur-e-mai hai magar surūr nahīñ
jal rahe haiñ charāġh nuur nahīñ

us kī mahfil meñ unhīñ kī raushnī jin ke charāġh
maiñ bhī kuchh hotā to merā bhī diyā hotā nahīñ

sāhil pe ab charāġh farozāñ hue to kyā
ġharqāb ham ko kar ke ye sāmāñ hue to kyā

fardā ko duur hī se hamārā salām hai
dil apnā shaam hī se charāġh-e-sahar huā

saa.e Dhalne charāg jalne lage
log apne gharoñ ko chalne lage

gumān ḳhaak meñ sab ke milāne vaalā hai
koī charāg havā.eñ bujhāne vaalā hai

jalā ke rakh liyā hāthoñ ke saath dāman tak
tumheñ charāġh bujhānā bhī to nahīñ aayā

yahāñ jo ik charāġh-e-zindagī thā
na jaane ab kahāñ rakkhā huā hai

vahī mailī mailī sī chāñdnī vahī dhundlī dhundlī sī raushnī
ye charāġh koī charāġh hai na jalā huā na bujhā huā

abhī jaleñge yahāñ aur be-ruḳhī ke charāġh
is anjuman meñ vafā aur surḳh-rū hogī

sutūn-e-dār pe rakhte chalo saroñ ke charāġh
jahāñ talak ye sitam kī siyāh raat chale

Dartā huuñ aa.ina huuñ kahīñ TuuT hī na jā.ūñ
ik lau sī huuñ charāġh kī koī bujhā na de