Tags-Charagh

gul kar na de charāġh-e-vafā hijr kī havā
tūl-e-shab-e-alam mujhe patthar banā na de

kisī din mujh ko le Dūbegā hijr-e-yār kā sadma
charāġh-e-hastī-e-mauhūm hogā gul samundar meñ

charāġh-e-dard tāq-e-jāñ pe rakh kar
havāoñ ko machalte dekhnā hai

ye raushnī to lau hai isī ik charāġh kī
taz.īn-e-dahr zehn kī nash-o-numā meñ dekh

ik raushnī sī dil meñ thī vo bhī nahīñ rahī
vo kyā ga.e charāġh-e-tamannā bujhā ga.e

tujhe bahut shauq thā mohabbat kī garm lapToñ se khelne kā
le jal ga.ī na hathelī ab ḳhush kahā thā maiñ ne charāġh rakh de

kisī ke saa.e ko qaid karne kā ik tarīqa batā rahā huuñ
ik us ke aage charāġh rakh de ik us ke pīchhe charāġh rakh de

hamārī ma.asūmiyat to dekho rakh aa.e dil ham huzūr-e-jānāñ
ki jaise koī ḳhudā kā banda havā ke aage charāġh rakh de

maiñ dil kī bātoñ meñ aa gayā aur uThā ke le aayā us kī paa.el
dimāġh detā rahā sadā.eñ charāġh rakh de charāġh rakh de

vo sirf qisse kahāniyoñ ke muāmle the charāġh rakh de
charāġh ghisne se koī jin-vin nahīñ nikalte charāġh rakh de

charāġh raushan zarūr kar to par is se pahle ḳhudā kī ḳhātir
yahāñ pe phailā hai jo añdherā sameT zer-e-charāġh rakh de

charāġh le ke bhī DhūñDne se charāġh jaisā nahīñ milegā
so rakhnī hai to charāġh se rakh nahīñ to pyāre charāġh rakh de

ik raushnī meñ Duube hue the mire charāġh
vo vasl ke liye mire pahlū meñ aa gayā

koī charāġh na jugnū na aa.ina na kitāb
ye kaisā ḳhvāb mirī aañkh par utārā hai

mushta.il rahne deñ inheñ ki bujhā.eñ
ye charāġh apne hī makān ke haiñ

aaj tak haiñ usī kūche meñ nigāheñ ābād
sūrateñ achchhī charāġh achchhe darīcha achchhā

ye gard-bād salāmat guzarnā chāhtā hai
mire charāġh pe vahshat tamām kartā huā

go huuñ muflis par huuñ apnī tīra-baḳhtī se namī
mere ghar meñ daulat-e-sūd-e-charāġh-e-kushta hai

nīm-jāñ huuñ zindagī dūd-e-charāġh-e-kushta hai
merī hastī sūrat-e-būd-e-charāġh-e-kushta hai

ai 'shagufta' mujh ko piirī meñ ye misra.a yaad hai
buud apnī vahm-e-nā-būd-e-charāġh-e-kushta hai