Tags-Charagh

tishnagī meñ yaas o hasrat ke charāġh
ġham-kade meñ apne jal jaayā kiye

shaguftan-e-jamāl ko hijāb-e-lams chāhiye
fasīl-e-shab kī oT meñ charāġh ye jalā rahe

vo hīla-gar haiñ jo majbūriyāñ shumār kareñ
charāġh ham ne jalā.e havā ke hote hue

abr se aur dhuup se rishta hai ek sā mirā
aa.ine aur charāġh ke biich kā fāsla huuñ maiñ

siyāh shab kī balāoñ ke haath lag ga.e the
mire charāġh havāoñ ke haath lag ga.e the

maiñ āñdhiyoñ se musālahat kaise kar sakūñgā
charāġh mere havā kī qīmat lagā rahe haiñ

jale charāġh to chupke se naam lo merā
mile ḳhushī to mirī chashm-e-tar ko yaad karo

lage bujhātā nahīñ vo dushman jalan ye hai pheñk rahā hai tan-man
charāġh sā dāġh-e-dil hai raushan diyā-salā.ī hai ustuḳhvāñ hai

āñdhiyāñ garm jo chaltī haiñ mirī aahoñ se
muñh chhupātā hai charāġh-e-tah-e-dāman kaisā

siina apnā hai hamārā dil-e-sozāñ apnā
sham-e-fānūs o charāġh-e-tah-e-dāman kaisā

alag jalāyā hai apnā charāġh is ḳhātir
tamām-umr saf-e-dostāñ meñ kyā rahnā

nā-murādī ho jis pe parvāna
vo jalātā phire charāġh-e-murād

charāġh shauq se āḳhir vo ho gayā raushan
liye thī qaid meñ jis ko ghaTā udāsī kī

charāġh pahle muñDeroñ pe maiñ ne rakkhe haiñ
phir intizār charāġhoñ meñ rakh diyā maiñ ne

roī hai saarī raat añdhere meñ be-kasī
aañsū bhare hue haiñ charāġh-e-mazār meñ

tavāf-e-kirmak-e-nādāñ kā chakkar ḳhatm hai 'āsif'
bas ab zarf-e-charāġh-e-anjuman kī āzmā.ish hai

ai falak tujh ko qasam hai mirī is ko na bujhā
ki ġharīboñ ko charāġh-e-shab-e-tārīk hai dil

guzar rahī hai yūñhī shām-e-zindagī 'sājid'
ki ik charāġh jalāte haiñ ik bujhāte haiñ

vahī huā ki ḳhud bhī jis kā ḳhauf thā mujhe
charāġh ko jalā ke bas dhuāñ milā mujhe

vo haqīqat hai dil-e-afsurda kī
TimTimā.e jaise sardī kā charāġh