Tags-Charagh

nā-shanāsoñ kī tahsīñ rañg laa.ī hai kyā kyā
koile bhī ab lāl-e-shab-charāġh haiñ yaaro

chamkā hai ye kaun jis ke aage
sūraj sā charāġh bujh gayā hai

havā ke ruḳh par charāġh-e-ulfat kī lau baḌhā kar chalā gayā hai
vo ik diye se na jaane kitne diye jalā kar chalā gayā hai

jiite to 'mīr' un ne mujhe daaġh hī rakkhā
phir gor par charāġh jalāyā to kyā huā

tirī raushan-jabīñ kā hai vo aalam
charāġh-e-māh bhī sharmā rahā hai

vo bhuul jaa.e mujhe us ko bhuul jā.ūñ maiñ
charāġh-e-jāñ use nisyāñ ke taaq par rakh duuñ

'shāhid' dayār-e-dil meñ añdherā hai chaar sū
raushan koī charāġh-e-mohabbat na kar sake

pahuñch gayā thā vo kuchh itnā raushnī ke qarīb
bujhā charāġh to palTā na tīrgī ke qarīb

ek charāġh aur ek kitāb aur ek umīd-e-asāsa
us ke ba.ad to jo kuchh hai vo sab afsāna hai

dil ke zaḳhmoñ ke bhalā kis ko mayassar haiñ charāġh
ashk-dar-ashk vo nazrāne bahut yaad aa.e

charāġh-e-zīst ke donoñ sire jalāo mat
agar jalāo to lau is qadar baḌhāo mat

vahī charāġh vafā kā bujhā ga.e 'āsif'
jo shahr-e-ḳhvāb kī ta.amīr karne vaale the

charāġh le ke unheñ DhūñDhiye zamāne meñ
jo log ishq kī tauqīr karne vaale the

huā mehmān aa kar raat bhar vo sham.a-rū barsoñ
rahā raushan mire ghar kā charāġh-e-ārzū barsoñ

jin ke andar charāġh jalte haiñ
ghar se bāhar vahī nikalte haiñ

jab bhī terī yādoñ kā silsila sā chaltā hai
ik charāġh bujhtā hai ik charāġh jaltā hai

ye pareshānī mirī sāmān-e-jam.īyat na ho
ye jigar-sozī charāġh-e-ḳhāna-e-hikmat na ho

kalba-e-mehnat-kashāñ ko de ke ġhairat kā charāġh
shaukat-e-qasr-e-zar-afshāñ bechtā phirtā huuñ maiñ

justujū rahrav-e-ulfat kī jo kāmil ho jaa.e
shauq-e-manzil hī charāġh-e-rah-e-manzil ho jaa.e

charāġh ghar meñ jalā chhoḌ kar ga.e the 'shakīl'
safar se lauTe to sab kuchh bujhā bujhā niklā