Tags-Charagh

bhare paḌe hue sab bāġh-o-rāġh the us din
galī meñ phuul gharoñ meñ charāġh the us din

ik ishq kā ġham aafat aur us pe ye dil aafat
yā ġham na diyā hotā yā dil na diyā hotā

añdherī raat meñ Tapkā thā ḳhūn-e-dil jis meñ
usī charāġh se sūraj nikal rahā hogā

hirs-e-duniyā chāhtī hai ye ki sīm-o-zar kī hoñ
ye charāġh-e-ḳhāna-e-ahl-e-havas kī tīliyāñ

sadiyāñ guzar rahī haiñ magar raushnī vahī
ye sar hai yā charāġh sar-e-dār dekhnā

is hijratī ko kaam huā hai ki raat din
bas vo charāġh aur vo dīvār dekhnā

ye jo mere man meñ hai raushnī yahī zindagī yahī bandagī
mirī fikr meñ tire zikr meñ jo charāġh haiñ vo jalā piyā

dāstāñ kahte haiñ jalte hue phūloñ ke charāġh
abhī kuchh aur suno dīda-varo aur suno

maiñ raushnī huuñ to merī pahuñch kahāñ tak hai
kabhī charāġh ke nīche bikhar ke dekhūñgī

'anīs' dam kā bharosā nahīñ Thahar jaao
charāġh le ke kahāñ sāmne havā ke chale

be-mahal dil ke bujhāne se unheñ kyā mil gayā
jis ko sham-e-sub.h samjhe vo charāġh-e-shām thā

jin ke lahū se qasr-e-vafā meñ jale charāġh
in ġham-zadoñ meñ aam haiñ rañj-o-mehan abhī

yahāñ charāġh tale luuT hai añdherā hai
kahāñ charāġh jalāne kī baat kartā huuñ

ziyā-farāz jahāñ haiñ hazār māh-o-nujūm
charāġh koī magar mere āshiyāñ meñ nahīñ

hue sar ba-kaf haiñ jo āñdhiyoñ kī uḌaan par
ye charāġh ishq kī hurmatoñ ke asiir haiñ

chhalke sharāb barq gire yā jaleñ charāġh
zikr-e-nigāh-e-yār kā mausam na aa.egā

charāġh sāmne vaale makān meñ bhī na thā
ye sāneha mire vahm-o-gumān meñ bhī na thā

allāh us charāġh ko raushan rakhe sadā
jo tīrgī meñ pahlī kiran kā sharīk thā