Tags-Charagh

ham husn-e-itiqād se samjhe chaḌhā.e phuul
gul kar diyā jo us ne charāġh-e-mazār ko

āmad-e-dost kī naved kū-e-vafā meñ aam thī
maiñ ne bhī ik charāġh sā dil sar-e-shām rakh diyā

sham.a har shaam tere rone par
sub.h-dam tak charāġh hañstā hai

ai falak tujh ko qasam hai mirī is ko na bujhā
ki ġharīboñ ko charāġh-e-shab-e-tārīk hai dil

dekheñge use charāġh aur maiñ
vo apnā libās utaar degā

dil meñ raushan haiñ mirī jaañ tirī yādoñ ke charāġh
shahr-e-ulfat meñ kabhī raat nahīñ ho saktī

hazār jalvoñ se pur-nūr bazm-e-ālam hai
magar charāġh-e-mohabbat kī raushnī kam hai

charāġh-e-ārzū yuuñ jhilmilā kar bujh gayā āḳhir
dam-e-āḳhir kisī kī yaad aa.ī hichkiyāñ ho kar

vo tīrgī hai ki ḳhud raah DhūñDne ke liye
charāġh haath meñ le kar sahar nikaltī hai

pahle charāġh-e-chashm ko raushan kiyā thā maiñ
phir phūTne lagī thī sitāroñ se raushnī

'shād' kuchh pūchho na mujh se mere dil ke daaġh ko
TimTimātā sā charāġh ik apne vīrāne meñ thā

hamāre shahr meñ hai vo gurez kā aalam
charāg bhī na jalā.e charāg se koī

vafā ke daaġh ko dil se miTā nahīñ saktā
ye vo charāġh hai tūfāñ bujhā nahīñ saktā

tilism TuuT chukā jab charāġh-e-zulmat kā
kabhī sabāhat-e-nām-o-nishān oḌh ke dekh

lahū meñ rañg-e-suḳhan us kā bhar ke dekhte haiñ
charāġh baam se jis ko utar ke dekhte haiñ

phailī thī chāroñ samt siyāhī ajiib sī
maiñ haath meñ charāġh liye ghūmtā rahā

kajlā ga.ī hai raushnī garche charāġh kī
lekin nahīñ huuñ aas se māyūs aaj tak

apne diye ko chāñd batāne ke vāste
bastī kā har charāġh bujhānā paḌā hameñ

miTānī hai jo diloñ kī duurī to falsafa hai ye āzmūda
charāġh-e-ulfat jalā.eñ ham tum diloñ kī nafrat ko raam kar ke

bas dekh chukī duniyā ye bazm-farozī bhī
rakkhā hai charāġh aisā bujhtā hai na jaltā hai