Tags-Charagh

log laa.e haiñ kahāñ se shab ko marmar ke charāġh
un chaTānoñ meñ to din ko rāsta paidā na thā

baḌī havelī ke taqsīm jab ujāle hue
jo be-charāġh the vo bhī charāġh vaale hue

nashisteñ pur haiñ charāġh-o-ayāġh raushan haiñ
bas ek mere na hone se aaj kyā huā hai

anokhī vaz.a hai saare zamāne se nirāle haiñ
ye āshiq kaun sī bastī ke yā-rab rahne vaale haiñ

maiñ lau meñ lau huuñ, alaav meñ huuñ alaav 'nadīm'
so har charāġh mirā e'tirāf kartā rahā

kahīñ bujh saktā hai 'māchis' ye mohabbat kā charāġh
jism kā ḳhuun hī jab tel huā jaatā hai

kahīñ charāġh jalā raushnī kahīñ pahuñchī
khulī thī aañkh kahīñ zindagī kahīñ pahuñchī

qadam qadam hai chakā-chauñd chāhatoñ kā charāġh
maiñ shahr-e-ā.ina jaltā huuñ āftāboñ se

mehrāboñ se mahal-sarā tak Dheroñ-Dher charāġh
jalte jaate haiñ be-nūrī baḌhtī jaatī hai

tarāsh luuñ koī jumla lab-e-ḳhamoshī se
charāġh-e-harf sar-e-tāq-e-shab jalā.ūñ koī

vasā.el jab ki saare ho chuke the be-asar 'anjum'
charāġh-e-dil jalā kar duur kī hai tīrgī ham ne

jis par charāġh roz jalātī thī raat ko
dil meñ jo ik mazār thā vo bhī nahīñ rahā

ḳhandāñ haiñ galī galī sitāre
ghar ghar kā charāġh ro rahā hai

apnī nashist chhoḌ ke vaañ rakh diyā charāġh
maiñ ne zamīn de ke bachā lī hai raushnī

charāġhoñ meñ vo charāġh is liye numāyāñ hai
ham aise dekhne vāloñ kā dhyān khīñchtā hai

kahīñ chāñd rāhoñ meñ kho gayā kahīñ chāñdnī bhī bhaTak ga.ī
maiñ charāġh vo bhī bujhā huā merī raat kaise chamak ga.ī

na jaane is qadar kyuuñ aap dīvāne se Darte haiñ
charāġh-e-anjuman haiñ aur parvāne se Darte haiñ

vo ik charāġh magar ham se duur duur jalā
hamīñ ne jis ko banāyā thā isti.āra-e-ḳhvāb

miT gayā dāġh-e-dil-zār bhī rafta rafta
bujh gayā aaj charāġh-e-shab-e-tanhā.ī bhī

maiñ to barzaḳh ke añdheroñ meñ jalā.ūñgā charāġh
maiñ nahīñ vo ki jo maut aa.ī to mar jā.ūñgā