Tags-Charagh

jo ek pal ko bujhe bazm-e-rañg-o-bū ke charāġh
to ham ne daar pe raushan kiye lahū ke charāġh

kabhī kabhī to 'ziyā' vo bhī vaqt aatā hai
bujhāne paḌte haiñ ḳhud apnī aarzū ke charāġh

ye naqsh-e-pā haiñ mire yā savād-e-manzil tak
qadam qadam pe numāyāñ haiñ justujū ke charāġh

bujhī jo sub.h to sīnoñ meñ dil jalā.e ga.e
huī jo shaam to raushan hue subū ke charāġh

maiñ ne adū ke ḳheme meñ bhejā hai ik charāġh
ye ain intiqām se aage kī baat hai

āḳhir charāġh-e-dard-e-mohabbat bujhā diyā
sar se kisī kī yaad kā patthar girā diyā

ḳhud charāġh ban ke jal vaqt ke andhere meñ
bhiik ke ujāloñ se raushnī nahīñ hotī

kar ke sadqe rakh diyā dil yuuñ maiñ us kī raah meñ
jaise chaurāhe meñ rakhte haiñ utāre kā charāġh

bujhe charāġh to hairāniyāñ kuchh aur baḌhīñ
hamāre saath hai ab tak hamārā saayā bhī

sukūt-e-shab meñ añdheroñ ko muskurāne de
bujhe charāġh to phir jism-o-jāñ jalāne de

taz.īn-e-bazm-e-ġham ke liye koī shai to ho
raushan charāġh-e-dil na sahī jām-e-mai to ho

aap apne vāste rakh leñ charāġh-e-ārzī
bas mirā sheva hai zulmat meñ utar kar dekhnā

ye mahr o mah be-charāġh aaise ki raakh ban kar bikhar rahe haiñ
ham apnī jaañ kā diyā bujhā.e kisī galī se guzar rahe haiñ

bujhā hai dil to na samjho ki bujh gayā ġham bhī
ki ab charāġh ke badle charāġh kī lau hai

na thī tā-sub.h kuchh hājat charāg o sham.a o mish.al kī
hamārī bazm meñ shab jalva-gar vo māh-e-paikar thā

vo mire dil kī raushnī vo mire daaġh le ga.ī
aisī chalī havā-e-shām saare charāġh le ga.ī

ḳhud hī charāġh ab apnī lau se nālāñ hai
naqsh ye kyā ubhrā ye kaisā zavāl huā

saath us ke rah sake na baġhair us ke rah sake
ye rabt hai charāġh kā kaisā havā ke saath

hai dāġh-e-ishq se raushan aur āh-e-sard se sard
hamāre dil kā to ḳhas-ḳhāna be-charāġh nahīñ

chamakte rahe āñsuoñ ke charāġh
kiyā yaad unheñ bā-vazū raat bhar