Tags-Charagh

tamām umr yūñhī tarz-e-būd-o-bāsh rahī
kahīñ charāġh banā maiñ kahīñ havā huā maiñ

ye mirī āstīn se niklī
rakh diyā dauḌ ke charāġh pe haath

añdhere chāroñ taraf saa.eñ saa.eñ karne lage
charāġh haath uThā kar duā.eñ karne lage

tā umr phir na hogī ujāloñ kī aarzū
tū bhī kisī charāg kī lau se lipaT ke dekh

aañkh kī muñDeroñ par aarzū nahīñ larzī
ik charāġh kī lau se ik charāġh ojhal thā

mere charāġh-e-zehn ko vo gul na kar sake
hālāñki sab añdhere mire dil meñ zam hue

jalte rahe charāġh kī sūrat tamām umr
lekin fazā-e-ġham ko farozāñ kiye hue

andher hai jo dam kī na is ke ho raushnī
yūsuf mirā charāġh hai bāzār ke liye

jal chuke chashm-e-a.izzā meñ charāġh
so bhī jā 'mullā' ki vaqt-e-shām hai

ik sub.h-e-zar-nigār kī ḳhātir tamām raat
ham ne ka.ī charāg jalā.e bujhā.e haiñ

peḌ paude girā diye jis ne
us havā meñ charāġh rakkhā hai

tirā lutf ātish-e-shauq ko had-e-zindagī se baḌhā na de
kahīñ bujh na jaa.e charāġh hī use dekh itnī havā na de

thā charāġh-e-iltijā lekin bujhā is shaan se
har muḳhātib se lab-e-iz.hār tak vo le gayā

bujh ga.e saare charāġh-e-jism-o-jāñ tab dil jalā
ḳhalq kī ḳhātir hamārā murshid-e-kāmil jalā

charāġh-e-shauq jalā raat ke asar se nikal
safar na rok tilismāt-e-rahguzar se nikal

gulāb khilte the chāhatoñ ke charāġh jalte the āhaToñ ke
jahāñ barastī haiñ vahshateñ ab kabhī vo rasta hī dūsrā thā

bujhā charāġh to parkhā junūñ bahattar kā
jinheñ lahū se ziyā bāñTne kī ḳhvāhish thī

pā kar charāġh-e-dil kī havas aur baḌh ga.ī
mausūf ko ab ik mah-e-kāmil bhī chāhiye

kisī insān kā dil ho ki charāġh
be jalā.e kabhī jaltā hī nahīñ

tārīk shab ne saare sitāre bujhā diye
maiñ sub.h kā charāġh thā jalnā paḌā mujhe