Tags-Charagh

hatheliyoñ meñ bhar ke baat to kareñ
charāġh ko mukālme kī ḳhū na ho

jalne vaalā hī samajh saktā hai dil kī aag ko
hijr meñ 'ārif' mirā hamdam charāġh-e-shām thā

bhayānak tīrgī meñ ġham kī jab dam ghuTne lagtā hai
charāġh-e-kushta-e-ishrat jalāne kaun aatā hai

añdherī raat ko maiñ roz-e-ishq samjhā thā
charāġh tū ne jalāyā to dil bujhā merā

phir bhī hai chahār-sū añdherā
sadiyoñ se charāġh jal rahā hai

tujh se raushan hai charāġh-e-mahfil-e-dār-o-rasan
mujh se bhī is daur meñ zinda hai parvāne kā naam

adam ke tārīk rāste meñ koī musāfir na raah bhūle
maiñ sham-e-hastī bujhā kar apnī charāġh-e-turbat jalā rahā huuñ

pas-e-charāġh maiñ jo samteñ DhūñDtā rahā 'turk'
vo ek lafz ke daurān meñ paḌī huī thiiñ

aao tumhārī nazr kareñ ham ek charāġh hikāyat kā
jab tak jaago raushan rakhnā niiñd aa.e to bujhā denā

ham charāġh aise ki ummīd hī lau hai jin kī
roz bujhte haiñ magar roz jalā karte haiñ

chand uljhī huī sāñsoñ kī atā huuñ kyā huuñ
maiñ charāġh-e-tah-e-dāmān-e-sabā huuñ kyā huuñ

kal tak jahāñ meñ jin ko koī pūchhtā na thā
is shahr-e-be-charāġh meñ vo mo'tabar hue

ābādī-e-dil hai dāġh-e-sozāñ
is ghar meñ charāġh jal rahā hai

saañs kī aas nigahbāñ hai ḳhabar-dār raho
dil charāġh-e-tah-e-dāmāñ hai ḳhabar-dār raho

jaañ ho agar matā-e-talab se azīz-tar
parvānoñ ko charāġh se Dar jaanā chāhiye

bujh rahe haiñ charāġh-e-dair-o-haram
dil jalāo ki raushnī kam hai

mire ḳhilāf tamām āñdhiyāñ zamāne kī
maiñ ik charāġh sadāqat kī raah par tanhā

tum apnī sham-e-tamannā ko ro rahe ho 'farāz'
in āñdhiyoñ meñ to pyāre charāġh sab ke ga.e

kuchh bhī nahīñ hai paas tumhārī duā to hai
is shahr-e-be-charāġh meñ ik aasrā to hai

ba-qadr-e-dil yahāñ se shola-e-jāñ-sāz miltā hai
charāġh-e-husn kī lau shoḳh bhī hai aur maddham bhī