Tags-Charagh

charāġh kah ke mirā nuur mujh se chhīn liyā
charāġh phir bhī rahūñgā bujhā huā hī sahī

zarā havāoñ ke ruḳh par bhī ik nazar Dāleñ
charāġh DhūñD rahe haiñ jo raushnī ke liye

duniyā meñ añdheroñ ke sivā aur rahā kyā
ik terī tamannā so charāġh-e-saharī hai

kise ḳhabar thī ki ḳhud raushnī ko tarsegā
charāġh-e-ishq jalāyā thā raushnī ke liye

vahī sitāra-numā ik charāġh hai 'āzar'
mirā ḳhayāl thā niklegā taaq se kuchh aur

ik sham-e-ārzū kī haqīqat hī kyā magar
tūfāñ meñ ham charāġh jalā.e hue to haiñ

vo diyā jis se ki raushan ho charāġh-e-hastī
ġhaur se dekheñ havāoñ meñ ghirā lagtā hai

rah-navardān-e-vafā manzil pe pahuñche is tarah
raah meñ har naqsh-e-pā merā banātā thā charāġh

tumhāre hijr kī shab-hā-e-kār meñ jānāñ
koī charāġh jalā luuñ agar ijāzat ho

charāġh-e-hujra-e-darvesh kī bujhtī huī lau
havā se kah ga.ī hai ab tamāshā ḳhatm hogā

māhaul tīrgī kā muqaddar baḌhā gayā
ghar kā charāġh ghar ke ujāle ko khā gayā

raat kā vo pahar bhī aa.egā
jhūmegī lau charāġh gā.egā

aamad pe terī itr o charāġh o subū na hoñ
itnā bhī būd-o-bāsh ko saada nahīñ kiyā

charāġh-e-shām kī āñkheñ bujhī haiñ
sitāra ḳhvāb kā TuuTā huā hai

āñdhiyoñ ko ye gumāñ hai ki bujhā deñgī charāġh
aur charāġhoñ ko ye zid hai ki ujālā ho jaa.e

na ham syāhī na ham ujālā charāġh haiñ ashk-e-ārzū ke
ki ham sar-dasht-e-be-karāñ haiñ sulagte rahte haiñ shaam se ham

sahar pashemān-e-ārzū haiñ charāġh-e-shab the so jal bujhe ham
ḳhirāj ashkoñ kā ḳhūn-e-dil se jo ham ko lenā thā le chuke ham

sukūt-e-shab meñ tirī chashm-e-nīm-vā ke sivā
koī charāġh nigahbān bhī nahīñ merā

tamām umar maiñ samjhā havā muḳhālif hai
mire charāġh meñ ḳhud ko jalā rahī thī havā

jise bhī jaanā ho jaa.e charāġh jaltā huā
baḌā kaThin thā agarche bujhā ke aa.ī huuñ