Tags-Charagh

bujhā diye haiñ vahīñ gardish-e-zamāna ne
jalā.e jis ne jahāñ bhī kahīñ sitam ke charāġh

vafā kā ek hī jhoñkā na sah sake zālim
tirī tarah hī ye nikle terī qasam ke charāġh

ret par jalte hue dekh sarāboñ ke charāġh
apne bikhrāv meñ vo aur sañvar jaatā hai

sho.ala-e-ġham jal uThā to bujh ga.e saare charāġh
ātish-e-dil gul huī to koī parvāna na thā

ḳhāna-e-nāz hai vo balki charāġh-e-murdā
dil ke ā.īne meñ gar rū-e-dil-ārām nahīñ

hamārī ġham-gusārī meñ shab-e-ġham
charāġh āhista āhista jale haiñ

vo chāñdnī kā muraqqa.a nahīñ thā jugnū thā
charāġh ban ke jalā aur shajar shajar meñ rahā

qadam qadam pe mujhe jis ne hausla baḳhshā
charāġh-e-rāh banī haiñ nasīhateñ us kī

har taraf tārīk thī duniyā magar
ik charāġh-e-dil thā jo bujhtā na thā

bujhā chukā hai zamāna charāġh sab lekin
ye merā ishq ki har rāsta dikhā.ī de

koī charāġh to āñdhī se bach ke niklegā
jalā diye haiñ bahut se diye havā ke liye

kaun yaad aa gayā azaañ ke vaqt
bujhtā jaatā hai dil charāġh jale

madār-e-zindagī Thahrā nafas kī āmad-o-shud par
havā ke zor se raushan charāġh-e-bazm-e-hastī hai

saare jahāñ pe jab thā vahshat kā abr taarī
chashm-o-charāġh-e-ālam thī sar-zamīñ hamārī

bujhne na do charāġh-e-vafā jāgte raho
pāgal huī hai ab ke havā jāgte raho

na.e charāġh sar-e-rahguzar jalā aa.ī
havā-e-nik.hat-e-gul thī ki merī bīnā.ī

mūjid jo nuur kā hai vo merā charāġh hai
parvāna huuñ maiñ anjuman-e-kā.enāt kā

haiñ 'shahāb' mere havās gum ki har ek shab hai shab-e-dahum
jo bujhā to bujh ke hī rah gayā hai charāġh phir se jalā nahīñ

hameñ ḳhabar hai ki ham haiñ charāġh-e-āḳhir-e-shab
hamāre ba.ad añdherā nahīñ ujālā hai

charāġh rakh ke sar-e-shām dil ke ziine par
mujhe ḳhabar nahīñ hotī sudhārtā hai koī