Tags-Charagh

charāġh ban ke sadā is liye jale ham log
hamārī zid thī ki ham ko havā dikhā.ī de

fuzūl tez havāoñ ko dosh detā hai
use charāġh jalāne kā hausla kam hai

ā.īna-bardār ḳhuld-e-shauq vo lauh-e-jabīñ
vo charāġh-e-tūr rū-e-pur-ziyā kal raat ko

charāg-e-ilm raushan hai haqīqat kī havāoñ par
hukūmat kar rahā hai ek goshe se fazāoñ par

bujhte hue charāġh farozāñ kareñge ham
tum aaoge to jashn-e-charāġhāñ kareñge ham

jalā liye haiñ usī vaqt āñsuoñ ke charāġh
shab-e-firāq meñ jab tīrgī se ghabrā.e

hājat-e-sham.a kyā hai turbat par
ham ki dil sā charāġh rakhte haiñ

chhoḌo ab us charāġh kā charchā bahut huā
apnā to sab ke hāthoñ ḳhasāra bahut huā

ghoñsle haiñ na gharauñde koī kuTiyā na charāġh
dekhiye aaj kahāñ ḳhair manātī hai ye shaam

zor se āñdhī chalī to bujh ga.e saare charāġh
gum hue jaate haiñ tārīkī meñ manzar aur maiñ

shab-e-firāq kā maarā huuñ dil-girafta huuñ
charāġh-e-tīrah-shabī huuñ maiñ jaltā rahtā huuñ

jis ke jaane se munavvar hue palkoñ pe charāġh
aaj tak us ne dikhāyā nahīñ chehrā apnā

vo jis meñ amn-o-mohabbat kā bol baalā ho
charāg-e-ilm se har samt ik ujālā ho

hayāt raqs meñ hai kā.enāt raqs meñ hai
charāġh-e-bāda jalāo ki raat raqs meñ hai

tū mard-e-momin hai apnī manzil ko āsmānoñ pe dekh nādāñ
ki rāh-e-zulmat meñ saath degā koī charāġh-e-alīl kab tak

behr-e-charāġh ḳhud ko jalāne vaalī maiñ
dhueñ meñ apne karb chhupāne vaalī maiñ

qurbat kī chhaTī jo dhund dekhā
raushan thā charāġh fāsle kā

hamārī nākāmī-e-vafā ne zamāne kī khol dī haiñ āñkheñ
charāġh kab kā bujhā paḌā hai magar añdherā kahīñ nahīñ hai

falak pe chāñd sitāroñ kā kārvāñ bhī bujhā
tumhārī yaad kā lekin charāġh jaltā rahā

tumhāre haath meñ taqdīr hai ujāloñ kī
charāġh ko ye ḳhabar kyā kahāñ añdherā hai