Tags-Charagh

siyāh raat ke badan pe daaġh ban ke rah ga.e
ham āftāb the magar charāġh ban ke rah ga.e

añdherā miTtā nahīñ hai miTānā paḌtā hai
bujhe charāġh ko phir se jalānā paḌtā hai

sukūt añdherā tahajjud kā vaqt raat charāġh
tumhāre paañv mire hoñT adā namāz aur ishq

ġhazal meñ jis kī hamesha charāġh jalte haiñ
use kahīñ se bulāo baḌā añdherā hai

koī sitāra nahīñ pattharoñ kī palkoñ par
koī charāġh jalāo baḌā añdherā hai

ḳhayāl-e-ruḳh pe hai mauqūf dil kī ābādī
kabhī na gul ho ilāhī charāġh-e-ḳhāna-e-ishq

chamak ke daaġh ye kahtā hai dil kī aahoñ se
havā se bujh nahīñ saktā charāġh-e-ḳhāna-e-ishq

tabī.at kushta-e-ġham ho ga.ī hai
charāġh-e-bazm-e-mātam ho ga.ī hai

chamak sake jo mirī ziist ke añdhere meñ
vo ik charāġh kisī samt se ubhar na sakā

jo azal meñ thā vahī nuur hai ki charāġh-e-mahfil-e-tūr hai
koī rahne vaalā zarūr hai mire dil meñ dard ke naam se

aarzū aur zamāne kī kashākash se gurez
zindagī aur charāġh-e-tah-e-dāmāñ kī tarah

mujhe charāġh kī hairat bhī ho chukī ma.alūm
ab is se aage koī rāsta batā mujh ko

phir us ke ghar meñ ho na sakī raushnī kabhī
jis kā charāġh tū ne jalā kar bujhā diyā

ye be-charāġh sī bastī ye be-sadā galiyāñ
har ek samt ye ujḌe hue makān se log

kamī hai kaun sī ghar meñ dikhāne lag ga.e haiñ
charāġh aur añdherā baḌhāne lag ga.e haiñ

charāġh-e-kushta kī mānind nauha-ḳhvāñ ye log
bane haiñ surḳhī-e-āġhāz kis fasāne kī

kisī meñ taab na thī tohmateñ uThāne kī
jale charāġh to palkeñ jhukīñ zamāne kī

purānī shaam na.e āñganoñ ko rotī hai
kahīñ charāġh kahīñ rat-jagoñ ko rotī hai

bujh chale haiñ saare yāroñ ke charāġh
ab charāġhoñ kā dhuāñ hai aur ham

ye qaht-e-sher paḌā ho na qaht-e-ġham ke sabab
charāġh itnā hī jaltā hai jitnā īñdhan ho