Tags-Charagh

ai mah-e-āsmān-jāh tujh sā nahīñ hai kaj-kulāh
le ke falak charāġh-e-māh DhūñDh phirā galī galī

ġhanīmat jāniye phir nīm-raushan
charāġh-e-rāh se apnī galī thī

'mus.hafī' hai vaqt-e-vidā-e-jahāñ
misl-e-charāġh-e-saharī kījiye

ujālā de charāġh-e-rahguzar āsāñ nahīñ hotā
hamesha ho sitārā ham-safar āsāñ nahīñ hotā

siyāh shahr kī qismat meñ merā faiz kahāñ
charāġh-e-nazr huuñ jaltā huuñ āstānoñ meñ

ye aur baat ki āñdhī hamāre bas meñ nahīñ
magar charāġh jalānā to iḳhtiyār meñ hai

kitnī vīrān hai ye mahfil-e-shab
na sitāre na charāġh

ye to sach hai ki ham tujhe pā na sake tirī yaad bhī jī se bhulā na sake
tirā daaġh hai dil meñ charāġh-e-sifat tire naam kī zeb-e-gulū-kafnī

āñdhiyoñ meñ charāġh raushan haiñ
aql kī mehrbāniyāñ tauba

mujhe marnā mubārak bas tamannā hai to itnī hai
bujhā deñ vo charāġh-e-zindagī ḳhud apne dāmāñ se

tumhāre husn kī tashbīb hī kahī hai abhī
charāġh jalne lage phuul mushk-bū hue haiñ

sham-e-nazar ḳhayāl ke anjum jigar ke daaġh
jitne charāġh haiñ tirī mahfil se aa.e haiñ

hameñ ye ḳhvāb titliyāñ talāshnā haiñ umr-bhar
ki haath ḳhālī nikle haiñ charāġh hai na taara hai

ye jo charāġh havāoñ kī dhun pe raqsāñ hai
use batāo abhī vaqt hai sudhar jaa.e

koī charāġh jahāñ raushnī kā zikr kare
siyāh raat kā chehra vahīñ utar jaa.e

purānī sham.eñ bujhā diiñ sabā ke jhoñkoñ ne
na.e charāġh jalāo bahār ke din haiñ

kis shai kā surāġh de rahā huuñ
andhe ko charāġh de rahā huuñ

pareshāñ raat meñ dil hai charāġh-e-ās kī mānind
shab-e-vāda na aa.e vo to raushan sī sahar kyuuñ ho

maiñ so rahā thā aur mirī ḳhvāb-gāh meñ
ik azhdahā charāġh kī lau ko nigal gayā

nāla-e-garm ne tāsīr ajab dikhlā.ī
rah gayā misl-e-charāġh aap meñ ThanDā ho kar