Tags-Charagh

qafas meñ aaj ye kaise charāġh raushan haiñ
ilāhī ḳhair na jaane chaman pe kyā guzrī

din lage haiñ ye raat ko merī
chashm-e-āhū charāġh-e-sahrā hai

charāġh un pe jale the bahut havā ke ḳhilāf
bujhe bujhe haiñ tabhī aaj bām-o-dar mere

charāġh-e-jāñ liye kis dasht meñ khaḌā huuñ maiñ
koī bhī qāfila yaañ se guzarne vaalā nahīñ

gul hue jaate haiñ charāġh kī tarah
ham ko Tuk jald aan kar dekho

mire ḳhuuñ se jalātā hai charāġh-e-shahr-e-ahl-e-zar
mire hī ghar ke āñgan meñ sahar aane nahīñ detā

kyā misl-e-charāġh-e-shab-e-āḳhir hai javānī
shiryānoñ meñ ik taaza tavānā.ī sī kyuuñ hai

nigah kī sho.ala-fazā.ī ko kam hai diid us kī
charāġh chāhtā hai lau zarā mazīd us kī

hameñ bujhā ke andheroñ meñ kyuuñ bhaTaktā hai
charāġh-e-rāh the ham phir jalā ke dekh hameñ

ye bazm-e-shab hai yahāñ ilm-o-āgahī kam hai
ka.ī charāġh jale phir bhī raushnī kam hai

jo jalā kare to jalā kare jo bujhā rahe to bujhā rahe
kisī aur ko na sunā.ī de vahī dard huuñ maiñ charāġh kā

siyah diloñ meñ sitāroñ kī fasl ugāne ko
hunar charāġh kī lau se milā rahegā mirā

tā umr phir na hogī ujāloñ kī aarzū
tū bhī kisī charāġh kī lau se lipaT ke dekh

hamāre ba.ad añdherā rahegā mahfil meñ
bahut charāġh jalāo.ge raushnī ke liye

ik dāġh-e-dil ne mujh ko diye be-shumār daaġh
paidā hue hazār charāġh is charāġh se

vo tīrgī hai rah-e-butāñ meñ charāġh-e-ruḳh hai na sham-e-vāda
kiran koī aarzū kī laao ki sab dar-o-bām bujh ga.e haiñ

charāġh-e-ishq badan se lagā thā kuchh aisā
maiñ bujh ke rah gayā us ko havā banāne meñ

yuuñ jalā.e zindagī bhar maiñ ne yādoñ ke charāġh
sāmne jin ke charāġh-e-dīgarāñ jaltā na thā

har aadmī ke qad se us kī qabā baḌī hai
sūraj pahan ke nikle dhuñdle charāġh yaaro

ashkoñ se kab miTe haiñ dāman ke daaġh yaaro
aise nahīñ bujheñge ġham ke charāġh yaaro