Tags-Charagh

ho gayā maġhrūr apnī lau pe ghar kā har charāġh
raushnī ke phail jaane se añdherā ho gayā

jugnū guhar charāġh ujāle to de gayā
vo ḳhud ko DhūñDne ke havāle to de gayā

kaan kī lau tirī zulfoñ meñ nahīñ
hai charāġh-e-tah-e-dāmān-e-balā

charāġh-e-qurb se kar dījiye unheñ raushan
bujhe bujhe se kuchh armān le ke aa.e haiñ

havā ne vaar kiyā to javāb pā.egī
ki ham charāġh bhī tūfān le ke aa.e haiñ

shāyad us dahlīz par rakkhā ho ab bhī vo charāġh
vāpsī kī raah meñ phir us ke ghar jā.eñge ham

ye daur vo hai ki baiThe raho charāġh-tale
sabhī ko bazm meñ dekho magar dikhā.ī na do

ek muddat se charāġh-e-sard sā rakkhā huuñ maiñ
is tavaqqo.a par ki āñchal kī bhaḌak aane ko hai

merā sher tere laboñ pe thā
ki charāġh dosh-e-havā pe thā

mire ham-nafas tū charāġh thā tujhe kyā ḳhabar mire haal kī
ki jiyā maiñ kaise dhuāñ dhuāñ tire saath bhī tire ba.ad bhī

yahī charāġh hai sab kuchh ki dil kaheñ jis ko
agar ye bujh gayā to aadmī bhī parchhā.īñ

maiñ jo shahīd huuñ lab-e-ḳhāndān-e-yār kā
kyā kyā charāġh hañstā hai mere mazār kā

bāzār kī fasīl bhī ruḳhsār par male
dūd-e-charāġh jo kisī shorāb se jale

charāġh bujhne lage aur chhā.ī tārīkī
chukā rahā thā maiñ qīmat havā se yaarī kī

chhupne lagī hai ziist añdheroñ kī god meñ
aao to phir charāġh-e-havādis jalā.eñ ham

bahut dinoñ se thī maddham charāġh-e-dard kī lau
ḳhud apnī aañch se sho.ala-ba-jāñ huā hai ye dil

sivā.e mere kisī ko jalne kā hosh kab thā
charāġh kī lau buland thī aur raat kam thī

ruuh meñ jal uThe haiñ aaj lazzat-e-qurb ke charāġh
soz-o-gudāz-e-hijr bhī shāmil-e-hāl hai nayā

jalāo ḳhūn-e-shahīdāñ se irtiqā ke charāġh
ye rasm chaltī rahī hai ye rasm ab bhī chale

zarā sambhal ke jalānā aqīdatoñ ke charāġh
bhaḌak na jaa.eñ ki masnad ye jal bhī saktī hai